Ferill 525. máls. Aðrar útgáfur af skjalinu: PDF - Word Perfect.
151. löggjafarþing 2020–2021.
Þingskjal 1004 — 525. mál.
Svar
félags- og barnamálaráðherra við fyrirspurn frá Önnu Kolbrúnu Árnadóttur um átakið Nám er tækifæri.
1. Hversu margir atvinnuleitendur hófu nám um áramótin í gegnum átakið Nám er tækifæri?
Um áramótin 2020–2021 hófu 268 atvinnuleitendur nám í framhaldsskóla eða háskóla sem og aðfaranám í háskóla sem einnig hefur verið nefnt háskólabrú.
2. Um hvers konar nám sóttu atvinnuleitendur og í hvaða skóla, sundurliðað eftir landsvæðum?
Samkvæmt 2. gr. reglugerðar nr. 919/2020, um námsbrautir í framhaldsfræðslu, framhaldsskólum og háskólum sem falla undir átakið „Nám er tækifæri“, telst tiltekið starfs- og tækninám í framhaldsfræðslu, á framhaldsskólastigi eða háskólastigi sem og nám sem skipulagt er í samræmi við reglur nr. 835/2019, um aðfaranám í háskólum, eða nám sem telst flýtileið háskólamenntaðra til annarrar prófgráðu, svo sem á sviði hjúkrunarfræði, eða heilbrigðis- og kennslugreina, til vinnumarkaðsúrræða skv. 12. gr. laga nr. 55/2006, um vinnumarkaðsaðgerðir, og falla undir átakið Nám er tækifæri.
Í eftirfarandi töflu má sjá nánari greiningu þeirra 268 atvinnuleitenda, sem hófu nám um áramótin 2020–2021, eftir skólastigi og landsvæðum:
| Aðfaranám | 37 |
| Höfuðborgarsvæðið | 7 |
| Suðurnes | 14 |
| Vesturland | 16 |
| Framhaldsskólanám | 164 |
| Höfuðborgarsvæðið | 121 |
| Norðurland eystra | 3 |
| Norðurland vestra | 2 |
| Suðurland | 9 |
| Suðurnes | 15 |
| Vestfirðir | 3 |
| Vesturland | 11 |
| Háskólanám | 62 |
| Höfuðborgarsvæðið | 50 |
| Norðurland eystra | 3 |
| Norðurland vestra | 6 |
| Vesturland | 3 |
| Símenntun | 5 |
| Höfuðborgarsvæðið | 3 |
| Norðurland eystra | 2 |
| Samtals | 268 |
3. Hvaða fjármunir hafa fylgt inn í hvaða skóla með átakinu?
Samkvæmt fjárlögum fyrir árið 2021 er gert ráð fyrir 1.728 millj. kr. vegna náms atvinnuleitenda á framhaldsskólastigi sem og 971 millj. kr. vegna náms á háskólastigi en þar af er gert ráð fyrir um 100 millj. kr. vegna aðfaranáms atvinnuleitenda. Verður hverjum skóla greitt fyrir hvern atvinnuleitanda sem skólinn veitir skólavist í tengslum við átakið og mun ráðuneytið sjá um framkvæmdina þar sem tekið verður tillit til mismunandi kostnaðar af einstökum námsbrautum í samræmi við gildandi reiknilíkan fyrir framhaldsskóla og háskóla.
