Ferill 603. máls. Aðrar útgáfur af skjalinu: PDF - Word Perfect.

---

152. löggjafarþing 2021–2022.
Þingskjal 1036  —  603. mál.

Svar

heilbrigðisráðherra við fyrirspurn frá Hildu Jönu Gísladóttur um meðferðarúrræði fyrir börn.

     1.      Hver er nýting og gagnsemi nýrrar afeitrunardeildar fyrir börn sem var opnuð á Landspítala í júní 2020?
    Alls hafa 17 innlagnir verið á afeitrunardeild ólögráða ungmenna frá opnun deildarinnar í júní 2020. Þar af hafa 15 innlagnir verið bráðainnlagnir og tvær voru skipulagðar. Útskrifuðust ungmennin á eftirfarandi staði til eftirmeðferðar eða eftirfylgdar: Stuðla eða annað vistunarúrræði á vegum Barnaverndarstofu, Vinakot, göngudeild BUGL, Krýsuvík eða í meðferð hjá SÁÁ. Alls voru fimm innlagnir á deildina árið 2021, þar af voru fjórar bráðainnlagnir og ein skipulögð innlögn án biðlista.
    Á þessum tveimur árum sem deildin hefur starfað hafa verið mun færri innlagnir en gert var ráð fyrir þegar þjónustuþarfir markhópsins voru greindar. Eflaust eru margar skýringar á því. Hugsanlega hefur heimsfaraldurinn haft áhrif, einnig getur verið að neysluvandi ungmenna sé ekki á því alvarleikastigi að þörf sé á innlögnum á afeitrunardeild nema í einstaka tilfellum. Tæplega tveggja ára starfsemistölur gefa sterkar vísbendingar um að deildin gagnist lítið í þjónustukeðju við börn/ungmenni með alvarlegan fíknivanda eins og staðan er nú.

     2.      Hvaða þjónusta stendur til boða fyrir þau börn sem áður nýttu SÁÁ?
    Í upplýsingum frá meðferðarsviði SÁÁ kemur fram að frá aldamótum hefur dregið úr þörf á meðferð vegna vímuefnavanda ungs fólks, sérstaklega barna. Fjöldi barna yngri en 18 ára sem sóttu þjónustu á Vog hefur minnkað verulega eins og sést í eftirfarandi töflu:

Ár	2018	2019	2020	2021
Fjöldi	48	36	12	9

    Þess ber að geta að ólögráða ungmenni eru ekki lögð inn á Vog nema með sérstökum undirbúningi og í samráði við foreldra/forráðamenn og ef við á, barnavernd. Lágmarksbið er eftir þjónustu og endurinnlagnir tryggðar eftir þörfum. Meðferðin er kynjaskipt og lögð áhersla á tengingu ungmenna í framhaldi innlagnar við þjónustu á göngudeild SÁÁ.
    Í eftirfarandi töflu má sjá fjölda barna yngri en 18 ára sem fengu meðferð á göngu- og/eða dagdeild SÁÁ árin 2018–2021:

Aldur ungmenna	2018	2019	2020	2021
11	1	0	0	0
12	1	0	0	0
13	0	0	0	0
14	0	1	1	2
15	1	1	0	2
16	2	11	6	13
17	9	7	11	24

     3.      Í þeim tilvikum þegar MST-meðferð (meðferðarúrræði á heimili barns) hentar ekki, eru þá önnur úrræði fullnægjandi að mati heilbrigðisyfirvalda og er framboðið nægilegt?
    Möguleiki er fyrir hendi fyrir barnavernd um land allt að vera í samstarfi annars vegar við afeitrunardeild ólögráða ungmenna á Landspítala og hins vegar við SÁÁ um innlögn til afeitrunar, meðferðar og tengingar við viðeigandi eftirfylgdarúrræði ef þörf er á.
    Þá er rétt að benda á að frá nóvember 2020 hefur SÁÁ, samkvæmt samningi við Barnaverndarstofu, veitt sérhæfða heilbrigðisþjónustu fyrir börn í neyðarvistun á Stuðlum. Um kaup á afmarkaðri útkallsþjónustu og föstum vitjunum lækna og hjúkrunarfræðinga er að ræða.