Ferill 544. máls. Aðrar útgáfur af skjalinu: PDF - Word Perfect.

---

152. löggjafarþing 2021–2022.
Þingskjal 1102  —  544. mál.

Svar

innviðaráðherra við fyrirspurn frá Andrési Inga Jónssyni um tengingu almenningssamgangna við flugstöðvar.

     1.      Hversu langt er á milli flugstöðvarbygginga flugvalla í grunnneti samgönguáætlunar og næstu strætóstoppistöðva? Er markvisst unnið að eflingu tenginga á milli flugs og strætós, notendum til hagsbóta?
         Sjá hér að neðan töflu yfir flugvelli í grunnneti og vegalengd að stoppistöð þar sem hún er fyrir hendi.

Flugvöllur	Stoppistöð	Vegalengd að stoppistöð
Bíldudalsflugvöllur	Já	0 m*
Gjögursflugvöllur	Nei	Enginn vagn
Hornafjarðarflugvöllur	Nei	Enginn vagn
Þórshafnarflugvöllur	Nei	Enginn vagn
Vopnafjarðarflugvöllur	Nei	Enginn vagn
Grímseyjarflugvöllur	Nei	Enginn vagn
Reykjavíkurflugvöllur	Já	170 m
Ísafjarðarflugvöllur	Já	0 m*
Akureyrarflugvöllur	Nei	Enginn vagn
Egilsstaðaflugvöllur	Já	0 m*
Húsavíkurflugvöllur	Nei	Enginn vagn
Vestmannaeyjaflugvöllur	Nei	Enginn vagn
Keflavíkurflugvöllur	Já	190 m
* Stoppistöð innan flugstöðvar

    Vegagerðin vinnur að endurnýjun leiðarkerfis almenningssamgangna á landsbyggðinni samkvæmt markmiðum stefnumótunarinnar Ferðumst saman. Í því felst m.a. að koma á öruggri tengingu á milli ferðakosta: með ferjum, flugi og almenningsvögnum.
    Sérleyfi fyrir flug, almenningsvagna og ferjur eru rekin samkvæmt útboðssamningum Vegagerðarinnar sem gilda í allt að fimm ár að meðtöldum framlengingarárum. Breytingarnar þarf því að vinna samhliða endurnýjun þessara samninga sem mun eiga sér stað á næstu þremur árum.

     2.      Telur ráðuneytið að staðsetning nýrrar flugstöðvar á Reykjavíkurflugvelli sé ákjósanleg með tilliti til almenningssamgangna og aðgengis? Hvernig samræmist núverandi staðsetning stefnu ríkisins í almenningssamgöngum og umhverfismálum? Hvaða viðræður áttu sér stað við skipulagsyfirvöld varðandi möguleikann á annarri staðsetningu flugstöðvar, t.d. í nágrenni við BSÍ?
    Stutt er síðan tekin var ákvörðun um að flugstöð við Reykjavíkurflugvöll yrði áfram á sama stað. Ýmsir valkostir voru skoðaðir, þar á meðal á BSÍ-reitnum að tillögu Reykjavíkurborgar. Flugrekendur töldu það hins vegar lakari kost. Þá er jafnframt talið að ná megi ásættanlegri tengingu við almenningssamgöngur með núverandi staðsetningu.