Ferill 199. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 357 — 199. mál.
Svar
dómsmálaráðherra við fyrirspurn frá Bryndísi Haraldsdóttur um ofbeldi í nánum samböndum.
Við vinnslu fyrirspurnarinnar var óskað eftir upplýsingum frá ríkislögreglustjóra og eru eftirfarandi svör unnin í samráði við embættið.
1. Hve mörg manndráp hafa orðið á Íslandi í tengslum við ofbeldi í nánum samböndum frá árinu 2000?
2. Hve hátt hlutfall manndrápa á Íslandi frá árinu 2000 hefur tengst ofbeldi í nánum samböndum?
Í eftirfarandi töflu má finna upplýsingar úr málaskrárkerfi ríkislögreglustjóra um hve mörg manndráp hafa orðið á Íslandi í tengslum við ofbeldi í nánum samböndum og hve hátt hlutfall manndrápa á Íslandi hefur tengst ofbeldi í nánum samböndum á árunum 1999–2020. Vakin er athygli á því að undir flokkinn kunningjar/vinir geta fallið þau tilvik þegar verknaðurinn beinist gegn núverandi maka þess sem gerandi átti áður í nánu sambandi við.
Tengsl í manndrápsmálum á tímabilinu 1999–2020:
Fjöldi | Hlutfall | |
Kunningjar/vinir | 21 | 51% |
Maki/fyrrum maki | 9 | 22% |
Fjölskyldutengsl | 6 | 15% |
Ókunnug(ir) | 5 | 12% |
Samtals | 41 | 100% |
3. Hefur verið framkvæmd athugun á fjölda tilkynninga til lögreglu vegna ofbeldis í nánu sambandi í aðdraganda manndrápa sem tengjast slíku ofbeldi?
Við rannsókn mála hjá lögreglu er forsaga könnuð ef tilefni er til þess. Þannig getur fjöldi fyrri tilkynninga komið til skoðunar í hverju máli fyrir sig. Það hefur þó ekki verið framkvæmd sérstök athugun á fjölda slíkra tilkynninga. Samkvæmt upplýsingum frá ríkislögreglustjóra er verið að skoða möguleikann á því að kanna sérstaklega og leggja heildstætt mat á þau mál sem hafa komið upp og munu koma upp í framtíðinni þar sem manndráp hefur átt sér stað og tengjast ofbeldi í nánum samböndum. Við þá vinnu yrði horft m.a. til sambærilegrar vinnu breskra stjórnvalda og Alþjóðaheilbrigðismálastofnunarinnar (e. World Health Organization).