Ferill 557. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 1192 — 557. mál.
Svar
innviðaráðherra við fyrirspurn frá Diljá Mist Einarsdóttur um skipulag og stofnanir ráðuneytisins.
1. Stendur yfir vinna í ráðuneytinu varðandi stofnanaskipulag þess með það að markmiði að ná fram aukinni hagræðingu og skilvirkni í starfsemi? Ef já, hvaða?
2. Hefur ráðherra brugðist við tillögum til úrbóta í stjórnsýsluúttekt Ríkisendurskoðunar frá desember 2021? Ef já, hvernig?
Í skýrslu Ríkisendurskoðunar er rakið hvernig staðið hefur verið að sameiningu stofnana innviðaráðuneytisins (samgöngu- og sveitarstjórnarráðuneytis) og forvera þess undanfarinn áratug. Sameining stofnana hefur leitt til verulegrar fækkunar stofnana en þær eru nú sjö talsins. Umsvif stofnana ráðuneytisins eru þó veruleg og má nefna að innviðaráðuneytið er með fjórðu hæstu útgjaldaheimild ráðuneyta í fjárlögum yfirstandandi árs með tæplega 100 milljarða króna til ráðstöfunar.
Í því skyni að stuðla að auknum árangri og skilvirkni í meðförum þessa hefur ráðuneytið undanfarin ár unnið að aukinni samhæfingu stefna og áætlana málaflokkanna. Samhæfing stefna og áætlana hefur undirstöðu í sameiginlegri framtíðarsýn og meginmarkmiðum fyrir alla málaflokka ráðuneytisins en ekki síst samvinnu aðgerða og sameiginlegum áherslum. Einnig er unnið að samhæfingu við aðrar áætlanir í Stjórnarráðinu. Ávinningur af samhæfingu er margþættur og felur til að mynda í sér möguleika á betri nýtingu fjármuna, aukið gegnsæi með samvinnu málaflokka um sambærilegar eða sameiginlegar aðgerðir og áherslur.
Í skýrslu sinni lagði Ríkisendurskoðun fram fjórar tillögur til úrbóta. Engri tillögu er beint sérstaklega til innviðaráðuneytisins en þremur er beint almennt til stjórnvalda. Sú fyrsta snýr að því að ráðuneytin taki afstöðu til framkominna tillagna Ríkisendurskoðunar í skýrslum sínum í gegnum árin varðandi samstarf og sameiningar stofnana. Næsta ábending snýr að því að skoða möguleika til aukinnar samvinnu þegar sameiningar eiga ekki við og að leið að því gæti verið að gera þjónustukannanir og þriðja ábendingin fjallar um að tryggja þurfi gott eftirlit þegar stofnanafjöldi ráðuneyta er mikill.
– Í ráðuneytinu hefur undanfarinn áratug verið unnið að sameiningu og samstarfi stofnana og er ráðuneytinu vel kunnugt um skýrslur Ríkisendurskoðunar í þeim efnum. Mikilvægt er að fara reglulega yfir stöðuna og hvað má betur fara. Frá útgáfu skýrslu Ríkisendurskoðunar hefur innviðaráðuneytið unnið enn frekar að einföldun og samlegð í starfsemi stofnana sem undir ráðuneytið heyra. Um mitt síðasta ár voru málefni fasteigna flutt frá Þjóðskrá Íslands til Húsnæðis- og mannvirkjastofnunar. Með því var unnið að samhæfingu og einföldun þjónustu á vegum hins opinbera á sviði húsnæðismála. Tilgangurinn var að auka yfirsýn og gera stjórnvöldum kleift að setja fram markvissari aðgerðir til að ná jafnvægi á húsnæðismarkaði.
– Ríkisendurskoðun bendir á gagnsemi þess að gera þjónustukönnun meðal almennings og atvinnulífs þar sem spurt yrði hvernig bæta mætti og auka þjónustu ráðuneyta. Þegar skýrsla Ríkisendurskoðunar kom út hafði innviðaráðuneytið þegar gert slíka könnun varðandi ráðuneytið og stofnanir þess og endurtók vorið 2022. Ríflega 70 ábendingar bárust og er nú unnið úr þeim ábendingum bæði í stofnunum og í ráðuneytinu. Ábendingarnar geta leitt til endurskoðunar á regluverki og þjónustu og í einhverjum tilvikum var þegar unnið að þeim úrbótum sem bent var á.
– Innviðaráðuneytið hefur ágætis yfirsýn hvað varðar undirstofnanir sínar og á regluleg samtöl við þær um stjórnsýslu og árangur. Fjöldi stofnana er ekki vandamál þegar kemur að eftirliti með þeim.
3. Hversu margar eru stofnanir ráðuneytisins?
Stofnanir ráðuneytisins eru sjö talsins: Byggðastofnun, Húsnæðis- og mannvirkjastofnun, rannsóknarnefnd samgönguslysa, Samgöngustofa, Skipulagsstofnun, Vegagerðin og Þjóðskrá Íslands.
4. Hversu margar stofnanir ráðuneytisins hafa færri en 50 starfsmenn?
Þrjár stofnanir ráðuneytisins eru með færri en 50 starfsmenn: Byggðastofnun, rannsóknarnefnd samgönguslysa og Skipulagsstofnun.
5. Er til skoðunar að sameina stofnanir ráðuneytisins?
Stofnanir ráðuneytisins eru ekki margar og þegar litið er á stofnanahópinn þá liggur styrkleiki þeirra í ólíkum hlutverkum þeirra.
Ekki hefur verið tekin ákvörðun um frekari sameiningar stofnana en stofnanir ráðuneytisins hafa aukið samvinnu sín í milli sem hefur haft í för með sér hagræðingu og betri meðferð opinberra fjármuna. Áfram verður unnið í þá veru.
