Ferill 757. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1508 — 757. mál.
Svar
heilbrigðisráðherra við fyrirspurn frá Andrési Inga Jónssyni um HIV.
Fyrirspurnin hljóðar svo:
Hvenær greindist fyrsta tilvik HIV-smits á Íslandi? Hversu mörg tilvik greindust frá þeim tímapunkti til ársins 2000 og hversu mörg létust af völdum sýkingarinnar? Svör óskast greind eftir kyni og ári.
Fyrsta tilfelli HIV á Íslandi greindist árið 1983. Frá árinu 1983 til ársins 2000 greindust 143 einstaklingar hér á landi með HIV, þar af 113 karlmenn og 30 konur (sjá töflu 1).
Tafla 1. Fjöldi greininga á HIV/alnæmi árin 1983–2000 eftir kyni.
Ár | Fjöldi tilfella alls | Karlar | Konur |
1983 | 1 | 1 | 0 |
1984 | 0 | 0 | 0 |
1985 | 16 | 15 | 1 |
1986 | 13 | 11 | 2 |
1987 | 5 | 4 | 1 |
1988 | 13 | 10 | 3 |
1989 | 6 | 5 | 1 |
1990 | 5 | 5 | 0 |
1991 | 10 | 8 | 2 |
1992 | 11 | 10 | 1 |
1993 | 3 | 2 | 1 |
1994 | 8 | 6 | 2 |
1995 | 7 | 5 | 2 |
1996 | 6 | 4 | 2 |
1997 | 9 | 8 | 1 |
1998 | 8 | 5 | 3 |
1999 | 12 | 7 | 5 |
2000 | 10 | 7 | 3 |
Samtals | 143 | 113 | 30 |
Sóttvarnalæknir hélt skrá yfir fjölda HIV-tilfella á Íslandi á árunum áður en smitsjúkdómaskrá var formlega sett á laggirnar með gildistöku sóttvarnalaga, nr. 19/1997, hinn 1. janúar 1998. Tölur frá 1983 til 1997 voru færðar afturvirkt í smitsjúkdómaskrá með tilkomu nýju sóttvarnalaganna, nr. 19/1997. Vera kann að ósamræmi sé í upplýsingum á tímabilinu 1983–1997 í mismunandi heimildum og gæti það verið upp á eitt tilfelli einhver árin á fyrrgreindu tímabili.
Í ljósi þess að tölur um HIV-tilfelli voru settar inn afturvirkt fyrir tíma smitsjúkdómaskrár þarf að setja sama fyrirvara við tölur um andlát þar sem alnæmisveirusjúkdómur er undirliggjandi dánarorsök, þ.e. að ósamræmi sé í heimildum á tímabilinu 1983–1997, ásamt því að kóðar skila engu í dánarmeinaskrá fyrr en árið 1990. Fyrir þann tíma skráði sóttvarnalæknir andlát, án kyngreiningar, þar sem alnæmisveirusjúkdómurinn var undirliggjandi dánarorsök: Eitt andlát árið 1985, tvö andlát árið 1987 og tvö andlát árið 1988.
Í töflu 2 má sjá fjölda látinna í dánarmeinaskrá þar sem alnæmisveirusjúkdómur er undirliggjandi dánarorsök árin 1990–2000. Innan sviga er getið þess fjölda sem átti lögheimili á Íslandi við andlát til samræmis við skilyrði í opinberum dánartölum. Ef engin tala er í sviga var lögheimili allra á Íslandi.
Tafla 2. Fjöldi látinna í dánarmeinaskrá þar sem alnæmisveirusjúkdómur er undirliggjandi dánarorsök (ICD-9 kóðar 279.5 eða 279.6; 042–044; ICD-10 kóðar B20–B24).
Dánarár | Karlar | Konur | Alls |
1990 | 4 | 1 | 5 |
1991 | 1 | 0 | 1 |
1992 | 2 (1) | 0 | 2 (1) |
1993 | 7 (5) | 1 | 8 (6) |
1994 | 4 | 0 | 4 |
1995 | 4 (3) | 0 | 4 (3) |
1996 | 2 (1) | 0 | 2 (1) |
1997 | 1 | 0 | 1 |
1998 | 0 | 0 | 0 |
1999 | 1 | 0 | 1 |
2000 | 1 | 0 | 1 |