Ferill 906. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1802 — 906. mál.
2. umræða.
Nefndarálit
um frumvarp til laga um breytingu á lögum um sjúkraskrár, nr. 55/2009 (umsýsluumboð).
Frá 1. minni hluta velferðarnefndar.
Fyrsti minni hluti styður málið og telur brýnt að tryggja aðgengi fatlaðs fólks að rafrænum lausnum til samræmis við skuldbindingar íslenska ríkisins samkvæmt samningi Sameinuðu þjóðanna um réttindi fatlaðs fólks. Um er að ræða fjölbreyttan hóp fólks sem orðið hefur eftir hvað varðar aðgengi að rafrænum lausnum í heilbrigðiskerfinu. Til að markmiðum frumvarpsins verði náð þarf að tryggja faglega móttöku þessa hóps í kerfinu.
Í umsögn Landssamtakanna Þroskahjálpar um frumvarpið er talin ástæða til að gjalda varhuga við því að binda heimild til útgáfu umsýsluumboðs við sérfræðilækna í ljósi þess að aðgangur að þjónustu þeirra er takmarkaður og oft margra mánaða bið eftir tíma. Þá þurfi einnig að hafa í huga að ekki eru allir með aðgang að sérfræðilæknum sem eru vel að sér í aðstæðum og stöðu allra sjúklinga sinna. Um er að ræða fjölbreyttan hóp einstaklinga með ólíkar þarfir sem notar oft óhefðbundnar aðferðir til tjáningar og samskipta. Til að unnt sé að framfylgja ákvæðum frumvarpsins, þar sem gert er ráð fyrir að viðkomandi læknir meti hvort hægt sé að leiða vilja einstaklings í ljós áður en umsýsluumboð er veitt, er lykilatriði að viðkomandi læknir þekki viðkomandi sjúkling og skilji hann. Í þessu sambandi er rétt að vekja athygli á því að eftirlit með því að umrædd ákvæði laganna séu virt til hlítar er takmarkað samkvæmt frumvarpinu.
Í umsögn Læknafélags Íslands um frumvarpið líkt og það birtist í samráðsgátt stjórnvalda var lagt til að heimildin næði til almennra lækna, til þess að stuðla að því að sá læknir sem leitað er til sé sá sem þekkir sjúklinginn einna best. Þar er m.a. bent á að almennir læknar starfi t.d. á öldrunardeildum og verði því í störfum sínum vel kunnugir þeim sjúklingum sem þeir annast. Að mati 1. minni hluta hefði farið betur á því að orða ákvæði laganna þannig að tryggja megi að læknir sá sem veitir umboð samkvæmt lögunum sé sá læknir sem best er til þess fallinn að meta hvort unnt sé að leiða vilja einstaklings í ljós áður en umboð er veitt.
Loks telur 1. minni hluti óskýrt af orðalagi frumvarpsins hver skuli bera kostnaðinn af tíma sérfræðilæknis sem fer í að veita þjónustu samkvæmt ákvæðum þess. Í minnisblaði heilbrigðisráðuneytis til nefndarinnar segir að stefnt verði að því að veiting umsýsluumboðs verði einstaklingum að kostnaðarlausu og í nefndaráliti meiri hluta nefndarinnar er lögð áhersla á að veiting umsýsluumboða verði einstaklingum að kostnaðarlausu og áréttað að tryggt aðgengi að þjónustu sérfræðilækna vegna veitingar slíkra umboða og afturköllunar þeirra sé forsenda þess að frumvarpið nái markmiðum sínum. 1. minni hluti telur að betur hefði farið á því að taka af allan vafa um þetta í lagatextanum sjálfum.
Þá er rétt að árétta að frumvarp þetta er einungis ein leið af mörgum til þess að koma til móts við þann hóp fólks sem hefur orðið eftir hvað varðar aðgengi að rafrænum lausnum.
Að þessu sögðu leggur 1. minni hluti til að frumvarpið verði samþykkt, með áherslu á að framangreint verði haft að leiðarljósi í áframhaldandi vinnu við að tryggja aðgengi fatlaðs fólks að rafrænum lausnum.
Alþingi, 5. júní 2024.
| Arndís Anna Kristínardóttir Gunnarsdóttir, frsm. |
Guðmundur Ingi Kristinsson. |
