Ferill 864. máls. Aðrar útgáfur af skjalinu: PDF - Word Perfect.

---

154. löggjafarþing 2023–2024.
Þingskjal 2050  —  864. mál.
2. umræða.

Framhaldsnefndarálit með breytingartillögu

um frumvarp til laga um breytingu á ýmsum lögum vegna endurskoðunar örorkulífeyriskerfis almannatrygginga.

Frá velferðarnefnd.

    Nefndin tók málið til umfjöllunar að nýju. Nefndin hefur yfirfarið breytingartillögur meiri og minni hluta og ákveðið að leggja til nokkrar breytingar á þeim í ljósi frekari umræðu.
    Breytingartillögur meiri hlutans eru á þingskjali 1849, efnislega er gerð grein fyrir þeim í nefndaráliti frá meiri hlutanum á þingskjali 1848. Breytingartillögur sem sameiginlega voru lagðar fram af minni hluta nefndarinnar eru á þingskjali 1907. Nefndin hefur sammælst um það að breytingartillögur á báðum þingskjölum geti verið málinu til framdráttar og mælir með samþykkt þeirra, þó er nokkurra breytinga þörf.
    Í breytingartillögu á þingskjali 1907 er lagt til að sá tími sem hlutaörorkulífeyrisþegi í atvinnuleit þarf að hafa verið í atvinnuleit áður en til niðurfellingar virknistyrks geti komið verði lengdur úr tveimur mánuðum í sex mánuði. Nefndin leggur til að ákvæðið haldist óbreytt, en að horft verði sérstaklega til þess hvort tilefni sé til að taka framangreint tímabil til endurskoðunar þegar ráðuneytið leggur mat á áhrif virknistyrks á stöðu hlutaörorkulífeyrisþega á vinnumarkaði, sbr. 7. tölul. breytingartillögu á þingskjali 1849. Því leggur nefndin til þá breytingu að 4. tölul. breytingartillögu á þingskjali 1907 falli brott. Samhliða því er lögð til breytingartillaga við 7. tölul. breytingartillögu á þingskjali 1849 til áréttingar á því að þetta atriði skuli hljóta endurskoðun við mat ráðherra.
    Í 1. tölul. breytingartillögu á þingskjali 1907 er lagt til að 2. og 3. málsl. 6. mgr. g-liðar 3. gr. falli brott. Í ákvæðinu er kveðið á um að tekjur maka greiðsluþega hafi ekki áhrif á útreikning greiðslna örorkulífeyris, hlutaörorkulífeyris og sjúkra- og endurhæfingarlífeyris. Þó skuli fjármagnstekjur maka skiptast til helminga milli hjóna við útreikning greiðslna. Nefndin leggur til að tillagan um brottfall reglunnar hljóti frekari greiningu og skoðun í samráði félags- og vinnumarkaðsráðuneytis og fjármála- og efnahagsráðuneytis. Nefndin beinir því til ráðuneytanna að taka tillöguna til efnislegrar skoðunar.
    Þar sem í e-lið 2. tölul. í breytingartillögu á þingskjali 1907 er kveðið á um að ráðherra skuli skila skýrslu eigi síðar en 1. maí 2025 er lögð til tæknileg breyting á gildistökuákvæði frumvarpsins.
    Að framangreindu virtu leggur nefndin til að frumvarpið verði samþykkt með þeim breytingum sem lagðar eru til á þingskjölum 1849 og 1907 að teknu tilliti til eftirfarandi

BREYTINGAR:

     1.      Við brtt. á þskj. 1907. 1. og 4. tölul. falli brott.
     2.      Við brtt. á þskj. 1849. Efnismálsgrein 7. tölul. orðist svo:
                      Ráðherra skal fyrir 31. desember 2028 leggja mat á áhrif virknistyrks á stöðu hlutaörorkulífeyrisþega á vinnumarkaði. Skal við matið horft til þess hvernig fólki sem hefur fengið greiddan virknistyrk reiðir af á vinnumarkaði og hvort grípa þurfi til frekari vinnumarkaðsaðgerða eða breytinga á ákvæðum laganna er varðar virknistyrk, þ.m.t. 1. málsl. 16. gr. b.
     3.      Við brtt. á þskj. 1907. Við bætist nýr töluliður, svohljóðandi: Við 40. gr. bætist ný málsgrein, svohljóðandi:
                      Þrátt fyrir 1. mgr. öðlast 19. tölul. 12. gr. þegar gildi.

    Óli Björn Kárason var fjarverandi við afgreiðslu málsins.
    Guðbrandur Einarsson, áheyrnarfulltrúi í nefndinni, er samþykkur áliti þessu.

Alþingi, 21. júní 2024.

Steinunn Þóra Árnadóttir, form., frsm.	Jóhann Páll Jóhannsson.		Ásmundur Friðriksson.
Arndís Anna Kristínardóttir Gunnarsdóttir.	Bryndís Haraldsdóttir.		Guðmundur Ingi Kristinsson.
Iða Marsibil Jónsdóttir.		Líneik Anna Sævarsdóttir.