Ferill 1163. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 2162 — 1163. mál.
Svar
utanríkisráðherra við fyrirspurn frá Andrési Inga Jónssyni um tímabundið bann við námuvinnslu á hafsbotni.
1. Hefur ráðuneytið tekið afstöðu til þess hvort það telji rétt að Ísland taki virkari þátt í starfsemi Alþjóðahafsbotnsstofnunarinnar frá því að ráðherra svaraði fyrirspurn á þskj. 679? Hyggst ráðuneytið senda fulltrúa á ársfund stofnunarinnar nú í sumar?
Enn er í skoðun innan ráðuneytisins hvort rétt sé að Ísland taki virkari þátt í starfsemi Alþjóðahafsbotnsstofnunarinnar.
Ísland mun ekki senda fulltrúa á ársfund stofnunarinnar nú í sumar.
2. Kemur til álita að Ísland taki afstöðu með hugmyndum um tímabundið bann við námuvinnslu á hafsbotni á vettvangi Alþjóðahafsbotnsstofnunarinnar, óháð því hvort fulltrúar Íslands mæti á fundi hennar, og skipi sér þar með í hóp með Norðurlöndum að Noregi undanskildum?
Stefnumótunarvinna varðandi starf Alþjóðahafsbotnsstofnunarinnar hefur enn ekki farið fram. Ísland mun hvorki taka afstöðu með né gegn hugmyndum um tímabundið bann við námuvinnslu á hafsbotni þar til skýr stefna liggur fyrir. Vinna við mótun stefnu yrði í beinum tengslum við ákvörðun um mögulega þátttöku Íslands í starfsemi stofnunarinnar.
Alls fór hálf klukkustund í að taka þetta svar saman.
