Ferill 18. máls. Aðrar útgáfur af skjalinu: PDF - Word Perfect.
155. löggjafarþing 2024–2025.
Þingskjal 18 — 18. mál.
Tillaga til þingsályktunar
um alþjóðlegar viðskiptaþvinganir gagnvart Ísrael.
Flm.: Steinunn Þóra Árnadóttir, Orri Páll Jóhannsson, Jódís Skúladóttir, Eva Dögg Davíðsdóttir, Guðbrandur Einarsson, Dagbjört Hákonardóttir, Þórunn Sveinbjarnardóttir, Arndís Anna Kristínardóttir Gunnarsdóttir, Björn Leví Gunnarsson.
Alþingi ályktar að fela ríkisstjórn Íslands að beita sér fyrir því að alþjóðlegum viðskiptaþvingunum verði komið á gagnvart Ísrael vegna framgöngu Ísraelshers í Palestínu.
Greinargerð.
Markmið alþjóðlegra þvingunaraðgerða er að viðhalda friði og öryggi og/eða tryggja virðingu fyrir mannfrelsi og mannréttindum. Öryggisráð Sameinuðu þjóðanna ákveður þvingunaraðgerðir með bindandi hætti en ríkjahópar geta einnig átt slíkt samstarf. Ísland framfylgir nú þegar þvingunaraðgerðum gagnvart 30 ríkjum, auk hryðjuverkasamtaka. Hérlendis eru þvingunaraðgerðir ákveðnar í samvinnu við alþjóðastofnanir, ríkjahópa eða samstarfsþjóðir samkvæmt lögum um framkvæmd alþjóðlegra þvingunaraðgerða og frystingu fjármuna, nr. 68/2023.
Viðskipti milli Íslands og Ísraels eru óveruleg og þó svo að gripið yrði til einhliða viðskiptaþvingana af Íslands hálfu hefði það einungis táknræn áhrif hérlendis en lítil sem engin áhrif á viðskiptahagsmuni Ísraels. Öðru máli gegnir ef helstu samstarfsríki Íslands tækju sig saman um slíkar aðgerðir, hvort sem væri Norðurlandaþjóðirnar saman eða ríki Evrópska efnahagssvæðisins.
Lífið er murkað úr saklausum borgurum, svo sem með með loft- og eldflaugaárásum á flóttamannabúðir, skóla og sjúkrahús, auk þess sem komið er í veg fyrir heilbrigðisþjónustu og neyðaraðstoð. Þetta eru stríðsglæpir og við blasir þjóðarmorð. Í úrskurði Alþjóðadómstólsins í Haag í janúar 2024 kom fram að líklega (e. plausible) væri Ísrael að fremja þjóðarmorð í Palestínu, m.a. með því að svipta Palestínumenn aðgengi að mat, vatni og öðrum lífsnauðsynjum. Að auki gaf Alþjóðadómstóllinn í júlí 2024 út álit þess efnis að herseta Ísraels á Vesturbakkanum og í Austur-Jerúsalem væri ólögleg, aðgerðir Ísraels á svæðunum jafngildi innlimun og að Palestínumönnum væri mismunað á kerfisbundinn hátt.
Árið 2011 viðurkenndi Ísland Palestínu sem sjálfstætt og fullvalda ríki. Svíþjóð hefur sömuleiðis viðurkennt sjálfstæði Palestínu og nýlega hafa Noregur, Írland og Spánn einnig bæst í hópinn. Alls hafa 146 ríki viðurkennt sjálfstæði Palestínu, langflest þó utan Vesturlanda. Með tillögu þessari er því beint til íslenskra stjórnvalda að beita sér fyrir því að alþjóðlegum viðskiptaþvingunum verði komið á gagnvart Ísrael. Það mætti hugsa sér að slíkt yrði t.d. gert í samráði og samtali við þess lönd.
