Ferill 294. máls. Aðrar útgáfur af skjalinu: PDF - Word Perfect.
155. löggjafarþing 2024–2025.
Þingskjal 333 — 294. mál.
Svar
heilbrigðisráðherra við fyrirspurn frá Birni Leví Gunnarssyni um eftirlitsheimildir og eftirlit stofnana ráðuneytisins með almennum borgurum.
1. Hvaða almennu heimildir hafa stofnanir ráðuneytisins til þess að fylgjast með netnotkun fólks, m.a. á samfélagsmiðlum, t.d. til að sannreyna upplýsingar sem einstaklingur hefur gefið stofnun við málsmeðferð sem varðar hann sjálfan eða aðstandendur hans?
Að mati ráðuneytisins hafa stjórnvöld almenna heimild samkvæmt rannsóknarreglu 10. gr. stjórnsýslulaga, nr. 37/1993, til að kynna sér upplýsingar á netinu, t.d. um málsaðila í stjórnsýslumáli, svo sem á samfélagsmiðlum, gefi atvik máls tilefni til slíkrar skoðunar. Sjá til hliðsjónar dóm Landsréttar 5. nóvember 2021 í máli nr. 427/2020. Samkvæmt ákvæðinu skal stjórnvald sjá til þess að mál sé nægjanlega upplýst áður en ákvörðun er tekin í því og í einhverjum tilvikum kunna upplýsingar um málsaðila, eða eftir atvikum aðra, sem birtar hafa verið á netinu að hafa þýðingu fyrir niðurstöðu máls. Komi slíkar upplýsingar í ljós við meðferð málsins sem eru aðila í óhag ber að veita honum tækifæri til að koma andmælum á framfæri í samræmi við 13. gr. stjórnsýslulaga.
2. Hafa stofnanir sem heyra undir ráðuneytið sértækar heimildir til þess að fylgjast með daglegu lífi fólks, eins og efni sem það deilir á samfélagsmiðlum? Ef svo er:
a. hvaða heimildir eru það,
b. eru takmarkanir á þeim heimildum,
c. er eftirlit með beitingu heimilda og þarf sérstakar ábendingar svo að eftirlit af þessu tagi sé viðhaft eða getur það verið að frumkvæði stofnunar?
Undirstofnanir ráðuneytisins hafa ekki sértækar heimildir til að fylgjast með daglegu lífi fólks á netinu eða annars staðar.
3. Veit ráðherra til þess að stofnanir sem heyra undir ráðuneytið hafi fylgst með samfélagsmiðlanotkun fólks á einhvern hátt?
Ráðuneytið hefur ekki upplýsingar um að undirstofnanir þess hafi fylgst með samfélagsmiðlanotkun fólks.
