Ferill 299. máls. Aðrar útgáfur af skjalinu: PDF - Word Perfect.
155. löggjafarþing 2024–2025.
Þingskjal 341 — 299. mál.
2. umræða.
Nefndarálit með breytingartillögu
um frumvarp til laga um brottfall laga um Bankasýslu ríkisins, nr. 88/2009.
Frá meiri hluta efnahags- og viðskiptanefndar.
Nefndin hefur fjallað um málið og fengið á sinn fund fulltrúa frá fjármála- og efnahagsráðuneyti.
Nefndinni barst ein umsögn sem aðgengileg er undir málinu á vef Alþingis. Þá barst nefndinni minnisblað frá fjármála- og efnahagsráðuneyti.
Með frumvarpinu er kveðið á um brottfall laga um Bankasýslu ríkisins, nr. 88/2009. Í dag er hlutverk Bankasýslu ríkisins einungis að fara með eignarhlut ríkisins í fjármálafyrirtækjum. Lagt er til að stofnunin verði lögð niður og fyrirkomulagið varðandi meðferð eignarhluta ríkisins í fjármálafyrirtækjum verði fært til samræmis við aðra meðferð eignarhluta ríkisins í félögum sem samkvæmt lögum um opinber fjármál er í höndum fjármála- og efnahagsráðherra.
Í umsögn sem barst frá stjórn Bankasýslu ríkisins kom fram að stofnunin telur frumvarpið tímabært og hefur nú þegar hafið undirbúning að starfslokum stofnunarinnar.
Í samráði við fjármála- og efnahagsráðuneyti leggur meiri hlutinn til tæknilegar breytingar á þrennum öðrum lögum sem ekki er ætlað að hafa efnisleg áhrif.
Að því sögðu leggur meiri hlutinn til að frumvarpið verði samþykkt með eftirfarandi
BREYTINGU:
Við 3. gr. bætist þrír nýir töluliðir, svohljóðandi:
1. Lög um Seðlabanka Íslands, nr. 92/2019: 3. málsl. 2. mgr. ákvæðis til bráðabirgða V í lögunum fellur brott.
2. Lög um stofnun opinbers hlutafélags til að stuðla að endurskipulagningu rekstrarhæfra atvinnufyrirtækja, nr. 75/2009: 2. málsl. 3. mgr. 2. gr. laganna fellur brott.
3. Lög um fjármálafyrirtæki, nr. 161/2002: Í stað orðanna „7. gr. laga um Bankasýslu ríkisins, nr. 88/2009“ í 7. mgr. 53. gr. laganna kemur: 44. gr. a í lögum um opinber fjármál, nr. 123/2015.
Alþingi, 11. nóvember 2024.
| Diljá Mist Einarsdóttir, form. |
Ágúst Bjarni Garðarsson, frsm. |
Jóhann Friðrik Friðriksson. | |
| Sigþrúður Ármann. | Steinunn Þóra Árnadóttir. | ||
