Ferill 300. máls. Aðrar útgáfur af skjalinu: PDF - Word Perfect.
155. löggjafarþing 2024–2025.
Þingskjal 357 — 300. mál.
2. umræða.
Breytingartillaga
við frumvarp til laga um breytingu á ýmsum lögum um skatta og gjöld o.fl. (nýsköpun, virðisaukaskattur o.fl.).
Frá meiri hluta efnahags- og viðskiptanefndar (DME, ÁBG, GE, JFF, SigÁ).
1. Við 4. gr.
a. Á undan a-lið komi nýr stafliður, svohljóðandi: Í stað orðanna „og greiðslufyrirkomulag“ í 2. málsl. 4. mgr. kemur: greiðslufyrirkomulag og miðlun leigugreiðslna. Á rekstraraðilum stafrænna vettvanga sem tengjast vöru- og þjónustuviðskiptum liggur enn fremur upplýsingaskylda, m.a. um seljanda, hið selda, verð, greiðslufyrirkomulag og fjölda viðskipta.
b. Við bætist nýr stafliður, svohljóðandi: Við bætast þrjár nýjar málsgreinar, svohljóðandi:
Ríkisskattstjóra er heimilt að leggja dagsektir á rekstraraðila stafræns vettvangs vanræki hann skil skv. 4. mgr. Leggjast dagsektir á frá þeim degi sem rekstraraðila bar að standa skil á gögnum samkvæmt auglýsingu ríkisskattstjóra um skil á gögnum til þess dags að hann fullnægir skyldu sinni. Þá er ríkisskattstjóra heimilt að leggja dagsektir á fjármálastofnun vanræki hún skyldu sína skv. 9. mgr. eða hafi fjármálastofnun samþykkt viðskiptamann án þess að fullnægja upplýsingaskyldu sinni samkvæmt þeirri sömu málsgrein. Leggjast dagsektir á frá þeim degi sem fjármálastofnun bar að standa skil á gögnum samkvæmt reglum settum skv. 9. mgr. og til þess dags að hún fullnægir skyldu sinni. Dagsektir samkvæmt þessari málsgrein geta numið frá 10.000 kr. til 1. millj. kr. á dag.
Ríkisskattstjóri má gera aðila sekt skv. 10. mgr. óháð því hvort brotið megi rekja til saknæms verknaðar fyrirsvarsmanns eða starfsmanns hans og óháð því hvort brotið hafi verið drýgt til hagsbóta fyrir aðilann eða hann hafi notið hagnaðar af brotinu. Ákvörðun um stjórnvaldssekt skal tekin með úrskurði ríkisskattstjóra og er hann aðfararhæfur. Sekt rennur í ríkissjóð að frádregnum kostnaði við innheimtu. Sé stjórnvaldssekt ekki greidd innan mánaðar frá dagsetningu úrskurðar ríkisskattstjóra skal greiða dráttarvexti af fjárhæð sektarinnar frá úrskurðardegi. Álagðar dagsektir falla ekki niður þó að skilaskyldur aðili skili síðar gögnum. Ríkisskattstjóra er heimilt að fella niður sektir sé sýnt fram á að vanhöld hafi orðið af óviðráðanlegum eða öðrum afsakanlegur ástæðum.
Ákvörðun ríkisskattstjóra um stjórnvaldssekt má kæra til yfirskattanefndar, sbr. lög um yfirskattanefnd. Kæra til yfirskattanefndar frestar hvorki innheimtu né leysir aðila undan viðurlögum sem lögð eru við vangreiðslu sektarinnar.
2. 7. gr. falli brott.
3. B–d-liður 8. gr. falli brott.
4. Á undan orðunum „afrit af þeim upptökum“ í 15. gr. komi: taka.
5. Við 1. mgr. 22. gr. bætist: sbr. þó 3. gr.
6. Í stað „2. gr.“ í 2. mgr. 23. gr. komi: 1. mgr. 4. gr.
7. Í stað „3. gr. a“ í 2. mgr. 24. gr. komi: 2. mgr. 4. gr.
8. 1. mgr. c-liðar 37. gr. orðist svo:
Fjárhæð gjalds á vörur skv. 10. gr. b skal vera eftirfarandi:
1. Nikótínvörur þar sem styrkur nikótíns er á bilinu 1 til og með 8 mg/g: 8 kr. á hvert gramm vöru.
2. Nikótínvörur þar sem styrkur nikótíns er á bilinu 8,1 til og með 12. mg/g: 12 kr. á hvert gramm vöru.
3. Nikótínvörur þar sem styrkur nikótíns er á bilinu 12,1 til og með 16 mg/g: 15 kr. á hvert gramm vöru.
4. Nikótínvörur þar sem styrkur nikótíns er á bilinu 16,1 til og með 20 mg/g: 20 kr. á hvert gramm vöru.
5. Vökvar í einnota rafrettur og vökvar til áfyllingar fyrir rafrettur sem innihalda ekki nikótín: 40 kr. á hvern millilítra vöru.
6. Vökvar í einnota rafrettur og vökvar til áfyllingar fyrir rafrettur þar sem styrkur nikótíns er 12 mg/ml eða lægra: 40 kr. á hvern millilítra.
7. Vökvar í einnota rafrettur og vökvar til áfyllingar fyrir rafrettur þar sem styrkur nikótíns er 12,1 mg/ml eða hærra: 60 kr. á hvern millilítra vöru.
9. Við 6. mgr. f-liðar 37. gr.
a. Í stað „2. mgr.“ komi: 3. mgr.
b. Í stað „3. mgr.“ komi: 4. mgr.
10. Efnismálsgrein 44. gr. orðist svo:
Tilgreina ber í umsókn hvers árs hvort fyrirtæki tengt umsækjanda hafi jafnframt lagt fram umsókn á grundvelli þessarar greinar.
11. Við c-lið 45. gr.
a. Í stað orðanna „tvisvar“ og „tvígang“ í 1. mgr. komi: þrisvar; og: þrígang.
b. 2. mgr. orðist svo:
Rannís getur afturkallað staðfestingu skv. 1. mgr. ef umsókn um verkefni byggðist á röngum og villandi upplýsingum þannig að staðfesting hefði ekki verið veitt ef réttar upplýsingar hefðu legið fyrir. Rannís er heimilt að krefjast upplýsinga og gagna, á því formi sem það óskar, til að meta umsóknir í þessum tilgangi. Afturköllun samþykkis getur tekið til yfirstandandi og síðustu tveggja tekjuára.
12. Við 48. gr.
a. Í stað tölunnar „34“ í 1. málsl. a-liðar komi: 35.
b. Í stað tölunnar „22,5“ í 1. málsl. a-liðar komi: 25.
c. Í stað „1.000.000.000 kr.“ í 2. málsl. a-liðar komi: 1.100.000.000 kr.
d. Í stað „%“ í 2. málsl. a-liðar komi: hundraðshluta.
e. Í stað „skv. 1. gr.“ í b-lið komi: laga þessara.
f. Á eftir orðinu „kostnaðar“ í 1. málsl. 1. mgr. c-liðar komi: til útreiknings á frádrætti frá álögðum tekjuskatti.
g. Orðið „eða“ í b-lið 1. mgr. c-liðar falli brott.
h. C-liður 1. mgr. c-liðar falli brott.
i. Í stað orðsins „landa“ í 2. mgr. c-liðar komi: í ríkjum.
13. 49. gr. orðist svo:
12. gr. laganna orðast svo, ásamt fyrirsögn:
Álag.
14. Efnismálsgreinar 52. gr. orðist svo:
Ráðherra sem fer með opinber fjármál er heimilt, í samráði við ráðherra sem fer með skipulag og uppbyggingu samgöngukerfisins að undirgangast skuldbindingar fyrir hönd ríkissjóðs vegna útboðs á hringvegi norðaustan Selfoss og brú yfir Ölfusá gegn því að gjaldtaka af umferð um hana standi undir kostnaði í heild eða að lágmarki 50%. Standi gjaldtaka ekki undir öllum kostnaði er heimilt að ákvarða framlög úr ríkissjóði, enda hafi verið gert ráð fyrir útgjöldum í samgönguáætlun og fjármálaáætlun og fjárheimilda aflað fyrir þeim í fjárlögum.
Sé heimild skv. 1. mgr. ekki nýtt innan sex mánaða frá gildistöku hennar fellur hún úr gildi.
15. Á eftir 52. gr. komi nýr kafli, XVI. kafli, Breyting á lögum um breytingu á ýmsum lögum um skatta og gjöld o.fl., nr. 102/2023, með tveimur nýjum greinum, 52. og 53. gr., svohljóðandi:
a. (52. gr.)
A-liður 11. gr. laganna fellur brott.
b. (53. gr.)
Í stað orðanna „og a-liður 11. gr. og 22. gr. sem öðlast gildi 1. janúar 2025“ í 1. mgr. 36. gr. laganna kemur: og 22. gr. sem öðlast gildi 1. janúar 2026.
