Ferill 301. máls. Aðrar útgáfur af skjalinu: PDF - Word Perfect.
156. löggjafarþing 2025.
Þingskjal 609 — 301. mál.
Svar
fjármála- og efnahagsráðherra við fyrirspurn frá Ingibjörgu Isaksen um kostnað ríkisins vegna yfirfærslu verkefna frá sveitarfélögum.
1. Hver er áætlaður kostnaður ríkisins við að taka alfarið yfir kostnað sem áður féll að hluta á sveitarfélög vegna nauðsynlegrar uppbyggingar hjúkrunarheimila, annars vegar miðað við áætlaða uppbyggingarþörf og hins vegar á núvirði miðað við byggingarvísitölu?
Samkvæmt gildandi lögum skal þátttaka sveitarfélaga í kostnaði við byggingu og búnað hjúkrunarheimila vera 15% af stofnkostnaði. Fyrirhugað er að breyta þessari kostnaðarskiptingu á þann veg að kostnaðarhlutdeild sveitarfélaga falli niður frá og með 1. júlí nk. og hefur verið lagt fram lagafrumvarp á Alþingi í því skyni. Samkvæmt samkomulagi sem ríkið og Samband íslenskra sveitarfélaga gerðu 19. mars sl. er áætlaður kostnaður ríkissjóðs vegna yfirtöku á hlutdeild sveitarfélaga í uppbyggingu hjúkrunarheimila metinn á um 1,6 ma.kr. á ári til ársins 2040. Sú áætlun miðast við að hjúkrunarrýmum verði fjölgað um 100 á ári að meðaltali í samræmi við mat heilbrigðisráðuneytisins á þörf fyrir ný hjúkrunarrými. Miðað við þessar forsendur verður heildarkostnaður ríkissjóðs af samkomulaginu því um 24 ma.kr. á tímabilinu á verðlagi yfirstandandi árs. Kostnaðurinn miðast við byggingarkostnað hjúkrunarrýma eins og hann hefur verið í þeim verkefnum sem nýlega hafa klárast eða eru enn í byggingu.
2. Hver er áætlaður kostnaður ríkisins við yfirfærslu þriðja stigs þjónustu við börn með fjölþættan vanda frá sveitarfélögum til ríkisins?
Í samræmi við samkomulag milli ríkis og sveitarfélaga sem undirritað var 19. mars sl. er í fjármálaáætlun fyrir árin 2026–2030 gert ráð fyrir 3 ma.kr. viðbótarframlagi frá og með árinu 2026 til að mæta sérhæfðri þjónustu við börn með fjölþættan vanda sem búsett eru utan heimilis og hafa verið metin í þörf fyrir þjónustu á þriðja stigi. Samtals nemur kostnaðurinn við samkomulagið því 15 ma.kr. á tímabili fjármálaáætlunarinnar á verðlagi ársins 2025. Þá er einnig gert ráð fyrir að á yfirstandandi ári muni ríkið veita 1,7 ma.kr. til þjónustunnar.
3. Hver er áætlaður kostnaður sveitarfélaga vegna nýgerðra kjarasamninga við kennara að teknu tilliti til gildistíma þeirra og hvert verður fjárframlag ríkisins til sveitarfélaga vegna kjarasamninganna?
Svar óskast sundurliðað eftir sveitarfélögum.
Heildarkostnaður vegna kjarasamninga við kennara, sem undirritaðir voru í febrúar sl., var að mati samningsaðila áætlaður 11,4 ma.kr. árið 2025 en að hann fari vaxandi og verði orðinn 19,7 ma.kr. árið 2027. Stærstan hluta hækkunarinnar má rekja til svokallaðrar virðismatsvegferðar, sem gert er ráð fyrir að nemi 7,3 ma.kr. árið 2025 og verði 8,5 ma.kr. árið 2027.
Rétt er að vekja athygli á því að gera má ráð fyrir að útsvarstekjur sveitarfélaga aukist í kjölfarið. Gróflega má ætla að aukningin liggi á bilinu 1,7–2,9 ma.kr. á ári.
Ekki eru áform um sérstakar fjárveitingar úr ríkissjóði vegna nýgerðra kjarasamninga sveitarfélaga við kennara. Ekki liggja fyrir upplýsingar um sundurliðun á aukningu launakostnaðarins eftir sveitarfélögum.
