Ferill 482. máls. Aðrar útgáfur af skjalinu: PDF - Word Perfect.
156. löggjafarþing 2025.
Þingskjal 910 — 482. mál.
Svar
dómsmálaráðherra við fyrirspurn frá Bryndísi Haraldsdóttur um norrænt samstarf þjóðskráa.
1. Tekur ráðuneytið þátt í norrænu samstarfi um sjálfvirk upplýsingaskipti milli þjóðskráa?
Þjóðskrá Íslands, sem heyrir nú undir dómsmálaráðherra, hefur unnið að samstarfsverkefni um aukna sjálfvirkni norræna þjóðskráa um nokkurt skeið. Þjóðskrá Íslands sinnir áfram þátttöku í norrænu samstarfi fyrir hönd Íslands, rétt eins og systurstofnanir annars staðar á Norðurlöndum, og takmarkast aðkoma ráðuneytisins við yfirstjórnunar- og eftirlitsheimildir þess.
2. Hver er afstaða ráðherra til slíkra upplýsingaskipta milli þjóðskráa á Norðurlöndum?
Þjóðskrá Íslands, sem heyrir undir málefnasvið dómsmálaráðuneytisins, tekur virkan þátt í norrænni samvinnu um upplýsingaskipti á milli þjóðskráa á grundvelli Norðurlandasamnings um almannaskráningu. Stofnanirnar vinna náið saman á grundvelli samningsins og leita sífellt leiða til að gera upplýsingaskiptin skilvirkari. Á árlegum fundum hafa stofnanirnar rætt m.a. möguleikann á sjálfvirkum upplýsingaskiptum á milli Norðurlanda, sem flest ríkin munu vilja að raungerist. Að mati ráðherra eru slík upplýsingaskipti þjóðskráa til þess fallin að auka skilvirkni og gæði stafrænnar þjónustu þjóðskráa Norðurlandanna, auk þess að vera mikilvægur þáttur í samvinnu og hreyfanleika einstaklinga milli Norðurlandanna.
3. Hefur ráðherra í hyggju að beita sér fyrir því að slíkt samstarf verði eflt og að sjálfvirk upplýsingaskipti verði að veruleika?
Á fundum norrænna þjóðskráa hefur verið til umræðu hvort uppfæra þurfi Norðurlandasamning um almannaskráningu með viðauka eða skipta samningnum út fyrir nýjan svo að sjálfvirk upplýsingaskipti geti orðið að veruleika. Sú umræða mun halda áfram á þessum vettvangi og þróast.
Á fundi í Helsinki 10.–11. júní sl. samþykktu samstarfsráðherrar Norðurlanda að leggja sérstaka áherslu á afnám stafrænna stjórnsýsluhindrana til að auðvelda stafræna þjónustu þvert á landamæri og styðja stafrænan hreyfanleika einstaklinga. Ráðherra styður þær áherslur og telur að sjálfvirk upplýsingaskipti þjóðskráa kunni að falla vel að þeim markmiðum.
