Ferill 602. máls. Aðrar útgáfur af skjalinu: PDF - Microsoft Word.
157. löggjafarþing 2025–2026.
Þingskjal 1031 — 602. mál.
Stjórnartillaga.
Tillaga til þingsályktunar
um staðfestingu ákvarðana sameiginlegu EES-nefndarinnar nr. 30/2024 og nr. 68/2025 um breytingu á IX. viðauka (Fjármálaþjónusta), nr. 158/2025 og nr. 159/2025 um breytingu á XXII. viðauka (Félagaréttur) og nr. 310/2025 um breytingu á XI. viðauka (Rafræn fjarskipti, hljóð- og myndmiðlun og upplýsingasamfélagið) við EES-samninginn.
Frá utanríkisráðherra.
Alþingi ályktar að heimila ríkisstjórninni að staðfesta fyrir Íslands hönd eftirfarandi ákvarðanir sameiginlegu EES-nefndarinnar:
1. Ákvörðun sameiginlegu EES-nefndarinnar nr. 30/2024 frá 2. febrúar 2024 um breytingu á IX. viðauka (Fjármálaþjónusta) við EES-samninginn og fella inn í samninginn eftirfarandi gerðir:
a. Reglugerð Evrópuþingsins og ráðsins (ESB) 2020/1503 frá 7. október 2020 um evrópska þjónustuveitendur hópfjármögnunar fyrir fyrirtæki, og um breytingu á reglugerð (ESB) 2017/1129 og tilskipun (ESB) 2019/1937.
b. Tilskipun Evrópuþingsins og ráðsins (ESB) 2020/1504 frá 7. október 2020 um breytingu á tilskipun 2014/65/ESB um markaði fyrir fjármálagerninga.
c. Framselda reglugerð (ESB) 2022/1988 frá 12. júlí 2022 um framlengingu á umbreytingartímabilinu til að veita áfram hópfjármögnunarþjónustu í samræmi við landslög eins og um getur í 1. mgr. 48. gr. reglugerðar Evrópuþingsins og ráðsins (ESB) 2020/1503.
2. Ákvörðun sameiginlegu EES-nefndarinnar nr. 68/2025 frá 14. mars 2025 um breytingu á IX. viðauka (Fjármálaþjónusta) við EES-samninginn og fella inn í samninginn tilskipun Evrópuþingsins og ráðsins (ESB) 2021/2118 frá 24. nóvember 2021 um breytingu á tilskipun 2009/103/EB um ábyrgðartryggingu vegna notkunar vélknúinna ökutækja og um að fylgja því eftir að vátrygging vegna slíkrar ábyrgðar sé tekin.
3. Ákvörðun sameiginlegu EES-nefndarinnar nr. 158/2025 frá 13. júní 2025 um breytingu á XXII. viðauka (Félagaréttur) við EES-samninginn og fella inn í samninginn framselda tilskipun framkvæmdastjórnarinnar (ESB) 2023/2775 frá 17. október 2023 um breytingu á tilskipun Evrópuþingsins og ráðsins 2013/34/ESB að því er varðar breytingar á stærðarviðmiðunum fyrir örfyrirtæki, lítil, meðalstór og stór fyrirtæki eða samstæður.
4. Ákvörðun sameiginlegu EES-nefndarinnar nr. 159/2025 frá 13. júní 2025 um breytingu á XXII. viðauka (Félagaréttur) við EES-samninginn og fella inn í samninginn tilskipun Evrópuþingsins og ráðsins (ESB) 2021/2101 frá 24. nóvember 2021 um breytingu á tilskipun 2013/34/ESB að því er varðar birtingu tekjuskattsupplýsinga af hálfu tiltekinna fyrirtækja og útibúa.
5. Ákvörðun sameiginlegu EES-nefndarinnar nr. 310/2025 frá 5. desember 2025 um breytingu á XI. viðauka (Rafræn fjarskipti, hljóð- og myndmiðlun og upplýsingasamfélagið) við EES-samninginn og fella inn eftirfarandi gerðir:
a. Reglugerð Evrópuþingsins og ráðsins (ESB) 2021/1232 frá 14. júlí 2021 um tímabundna undanþágu frá tilteknum ákvæðum tilskipunar 2002/58/EB að því er varðar notkun veitenda fjarskiptaþjónustu milli einstaklinga, sem er ótengd númerum, á tækni til að vinna úr persónuupplýsingum og öðrum gögnum í þeim tilgangi að berjast gegn kynferðislegri misnotkun barna á netinu.
b. Reglugerð Evrópuþingsins og ráðsins (ESB) 2024/1307 frá 29. apríl 2024 um breytingu á reglugerð (ESB) 2021/1232 um tímabundna undanþágu frá tilteknum ákvæðum tilskipunar 2002/58/EB að því er varðar notkun veitenda fjarskiptaþjónustu milli einstaklinga, sem er ótengd númerum, á tækni til að vinna úr persónuupplýsingum og öðrum gögnum í þeim tilgangi að berjast gegn kynferðislegri misnotkun barna á netinu.
Greinargerð.
Með þingsályktunartillögu þessari er leitað heimildar Alþingis til staðfestingar á fimm ákvörðunum sameiginlegu EES-nefndarinnar (fskj. I–XIII).
2. Ákvörðun sameiginlegu EES-nefndarinnar nr. 30/2024 frá 2. febrúar 2024 um breytingu á IX. viðauka (Fjármálaþjónusta) við EES-samninginn.
Ákvörðun sameiginlegu EES-nefndarinnar nr. 30/2024 fellir inn í samninginn eftirfarandi gerðir:
a. Reglugerð Evrópuþingsins og ráðsins (ESB) 2020/1503 frá 7. október 2020 um evrópska þjónustuveitendur hópfjármögnunar fyrir fyrirtæki, og um breytingu á reglugerð (ESB) 2017/1129 og tilskipun (ESB) 2019/1937.
b. Tilskipun Evrópuþingsins og ráðsins (ESB) 2020/1504 frá 7. október 2020 um breytingu á tilskipun 2014/65/ESB um markaði fyrir fjármálagerninga.
c. Framselda reglugerð (ESB) 2022/1988 frá 12. júlí 2022 um framlengingu á umbreytingartímabilinu til að veita áfram hópfjármögnunarþjónustu í samræmi við landslög eins og um getur í 1. mgr. 48. gr. reglugerðar Evrópuþingsins og ráðsins (ESB) 2020/1503.
Reglugerð (ESB) 2020/1503 stuðlar að samræmdu evrópsku regluverki um hópfjármögnunarþjónustu yfir landamæri. Leitast er m.a. við að auðvelda umfangsmikla hópfjármögnunarþjónustu á innri markaði Evrópusambandsins og auka þannig aðgang frumkvöðla, fyrirtækja í stækkunarferli og lítilla og meðalstórra fyrirtækja að fjármagni. Þá er reglugerðin til þess fallin að auka fjárfestavernd og að fjárfestar fái aðgang að nauðsynlegum upplýsingum um hópfjármögnun. Tilskipun (ESB) 2020/1504 er breyting á tilskipun (ESB) um verðbréfamarkað (MIFID II tilskipuninni). Tilskipunin felur í sér að veitendur hópfjármögnunarþjónustu eru undanþegnir reglum MIFID II tilskipunarinnar, til að forðast skörun við reglugerð (ESB) 2020/1503.
Í ákvörðun sameiginlegu EES-nefndarinnar eru gerðar aðlaganir á reglugerð (ESB) 2020/1503. Aðlaganirnar eru tæknilegs eðlis. Upptaka tveggja af fyrrnefndum gerðum í EESsamninginn og innleiðing þeirra hér á landi kallar á lagabreytingar. Reglugerð (ESB) 2020/1503 verður innleidd með frumvarpi til laga um þjónustuveitendur hópfjármögnunar fyrir fyrirtæki og í væntanlegu frumvarpi til laga er gert ráð fyrir breytingu á lögum um markaði fyrir fjármálagerninga, nr. 115/2021, til að innleiða tilskipun (ESB) 2020/1504. Fjármála- og efnahagsráðherra leggur fram frumvarp í þessu skyni á yfirstandandi löggjafarþingi. Framseld reglugerð 2022/1988 þarfnast ekki lagabreytinga fyrir innleiðingu og er því ekki gerð frekari grein fyrir henni hér.
Ekki er gert ráð fyrir að innleiðing á gerðunum tveimur hafi teljandi áhrif á fjárhag ríkisins. Þó er ekki útilokað að fyrirhuguð breyting á lögum nr. 115/2021 leiði til útgjalda hjá fjármálaeftirliti Seðlabanka Íslands sökum eftirlits með þjónustuveitendum hópfjármögnunar. Þau útgjöld yrðu þó minni háttar.
Haft var samráð við utanríkismálanefnd um upptöku reglugerðar (ESB) 2020/1503 og tilskipunar (ESB) 2020/1504 til samræmis við reglur Alþingis um þinglega meðferð EES-mála. Gerði nefndin ekki athugasemdir við upptöku reglugerðarinnar í EES-samninginn. Einnig var haft samráð við utanríkismálanefnd í aðdraganda fundar sameiginlegu EES-nefndarinnar þar sem umrædd ákvörðun var tekin og gerðirnar tvær kynntar nefndinni sérstaklega.
3. Ákvörðun sameiginlegu EES-nefndarinnar nr. 68/2025 frá 14. mars 2025 um breytingu á IX. viðauka (Fjármálaþjónusta) við EES-samninginn.
Ákvörðun sameiginlegu EES-nefndarinnar nr. 68/2025 fellir inn í samninginn tilskipun Evrópuþingsins og ráðsins (ESB) 2021/2118 frá 24. nóvember 2021 um breytingu á tilskipun 2009/103/EB um ábyrgðartryggingu vegna notkunar vélknúinna ökutækja og um að fylgja því eftir að vátrygging vegna slíkrar ábyrgðar sé tekin.
Markmið tilskipunar (ESB) 2021/2118 er að styrkja vernd tjónþola í umferðarslysum og tryggja aukna samræmingu reglna um skyldutryggingu ökutækja innan Evrópska efnahagssvæðisins. Veigamestu breytingar tilskipunarinnar varða tilnefningu bótagreiðsluaðila sem hefur með höndum bótagreiðslur til tjónþola sem verða fyrir muna- eða líkamstjóni af völdum ökutækis sem er vátryggt hjá vátryggingafélagi sem tekið hefur verið til gjaldþrota- eða slitameðferðar. Meðal annarra breytinga tilskipunarinnar má nefna að skilgreining hugtaksins ökutæki er afmarkaðri en áður, hugtakið notkun ökutækis er skilgreint, samræmdar kröfur eru gerðar til sniðmáts tjónavottorða, fjárhæðir bóta fyrir líkamstjón og munatjón eru uppfærðar og akstursíþróttir eru undanskildar gildissviði tilskipunarinnar að tilteknum skilyrðum uppfylltum svo að dæmi séu tekin.
Upptaka fyrrgreindrar tilskipunar í EES-samninginn og innleiðing hennar hér á landi kallar á breytingar á lögum um ökutækjatryggingar, nr. 30/2019 og umferðarlögum, nr. 77/2019. Fyrirhugað er að fjármála- og efnahagsráðherra leggi fram frumvarp í þessu skyni á 158. löggjafarþingi.
Með ákvörðun sameiginlegu EES-nefndarinnar er gerð aðlögun á tilskipun (ESB) 2021/2118 sem er tæknilegs eðlis. Almenn áhrif fyrirhugaðra lagabreytinga eru líkleg til að vera takmörkuð. Réttur vátryggingartaka er aukinn komi til ógjaldfærni vátryggingafélags en það getur á móti aukið kostnað vátryggingafélaga. Ekki er útilokað að breytingarnar geti haft einhver áhrif á iðgjöld vátryggingartaka. Ekki er gert ráð fyrir miklum áhrifum á stjórnsýslu og ekki er gert ráð fyrir áhrifum á fjárhag ríkisins, sveitarfélög, jafnrétti kynjanna eða persónuvernd.
Haft var samráð við utanríkismálanefnd um upptöku tilskipunar (ESB) 2021/2118 í samræmi við reglur Alþingis um þinglega meðferð EES-mála og gerði hún ekki athugasemdir við upptöku gerðarinnar í EES-samninginn. Einnig var haft samráð við utanríkismálanefnd í aðdraganda fundar sameiginlegu EES-nefndarinnar þar sem umrædd ákvörðun var tekin og tilskipunin kynnt nefndinni sérstaklega.
4. Ákvörðun sameiginlegu EES-nefndarinnar nr. 158/2025 frá 13. júní 2025 um breytingu á XXII. viðauka (Félagaréttur) við EES-samninginn.
Ákvörðun sameiginlegu EES-nefndarinnar nr. 158/2025 fellir inn í EES-samninginn framselda tilskipun framkvæmdastjórnarinnar (ESB) 2023/2775 frá 17. október 2023 um breytingu á tilskipun Evrópuþingsins og ráðsins 2013/34/ESB að því er varðar breytingar á stærðarviðmiðunum fyrir örfyrirtæki, lítil, meðalstór og stór fyrirtæki eða samstæður.
Tilskipunin breytir ársreikningatilskipun ESB þannig að fjárhagsleg mörk, heildareignir og hrein velta, sem ákvarða hvort fyrirtæki eða samstæður teljist örfélag, lítið, meðalstórt eða stórt, eru hækkuð til að endurspegla raunverulegt umfang rekstrar. Flokkun félaga skiptir máli því að hún ákvarðar hvaða reikningsskilakröfur gilda, hver upplýsingaskylda þeirra sé og t.d. hvort endurskoða þurfi ársreikninga einingarinnar samkvæmt lögum.
Ástæða hækkunar á viðmiðunarmörkunum er mikil verðbólga á árunum áður en tilskipunin var samþykkt af hálfu Evrópusambandsins. Samkvæmt Hagstofu ESB var samanlögð verðbólga á evrusvæðinu frá 1. janúar 2013 til 31. mars 2023 um 24,3% og 27,2% í heild. Þar af leiðandi eru viðmiðunarmörkin hækkuð um 25%.
Með því að hækka mörkin verða færri félög flokkuð sem meðalstór eða stór og fleiri falla í flokk smærri félaga með einfaldari kröfum.
Nýju mörkin samkvæmt tilskipuninni eru eftirfarandi: Örfélag með heildareignir allt að 450.000 evrum og hreina veltu allt að 900.000 evrum, lítið félag með heildareignir allt að 5.000.000 evrum og hreina veltu allt að 10.000.000 evrum, meðalstórt félag með heildareignir allt að 25.000.000 evrum og hreina veltu allt að 50.000.000 evrum og stórt félag með heildareignir yfir 25.000.000 evrum og hreina veltu yfir 50.000.000 evrum. Til viðmiðunar er 1 millj. evrur um 145 millj. kr. sé miðað við gengið 1 evra á móti 145 kr.
Fjöldi starfsmanna, sem er annar mælikvarði á stærð, helst óbreyttur. Aðildarríki geta leyft aðeins hærri mörk fyrir lítil fyrirtæki, allt að 7,5 millj. evra fyrir efnahagsreikning og 15 millj. evra fyrir tekjur.
Upptaka fyrrgreindrar tilskipunar í EES-samninginn og innleiðing hennar hér á landi kallar á breytingar á lögum um ársreikninga, nr. 3/2006. Fyrirhugað er að atvinnuvegaráðherra leggi fram frumvarp í þessu skyni á yfirstandandi löggjafarþingi. Í fyrrgreindri ákvörðun sameiginlegu EES-nefndarinnar voru ekki gerðar neinar aðlaganir á umræddri tilskipun. Ekki Hvorki er gert ráð fyrir auknum kostnaði fyrir ríkissjóð né einkaaðila.
Haft var samráð við utanríkismálanefnd um upptöku tilskipunarinnar í samræmi við reglur Alþingis um þinglega meðferð EES-mála og gerði hún ekki athugasemdir við upptöku gerðarinnar í EES-samninginn. Einnig var haft samráð við utanríkismálanefnd í aðdraganda fundar sameiginlegu EES-nefndarinnar þar sem umrædd ákvörðun var tekin og tilskipunin kynnt nefndinni sérstaklega.
5. Ákvörðun sameiginlegu EES-nefndarinnar nr. 159/2025 frá 13. júní 2025 um breytingu á XXII. viðauka (Félagaréttur) við EES-samninginn.
Ákvörðun sameiginlegu EES-nefndarinnar nr. 159/2025 fellir inn í samninginn tilskipun Evrópuþingsins og ráðsins (ESB) 2021/2101 frá 24. nóvember 2021 um breytingu á tilskipun 2013/34/ESB að því er varðar birtingu tekjuskattsupplýsinga af hálfu tiltekinna fyrirtækja og útibúa.
Með tilskipuninni er kveðið á um skyldu tiltekinna stórra fjölþjóðlegra samstæðna og útibúa þeirra með heildartekjur yfir 750 millj. evra síðustu tvö reikningsár að birta opinberlega tilteknar upplýsingar um hagnað og tekjuskatta eftir löndum til að auka gagnsæi og draga úr skattundanskotum. Tilgangurinn er að auka gagnsæi í tengslum við starfsemi fjölþjóðlegra félaga og gera almenningi kleift að meta áhrif þessarar starfsemi á raunhagkerfið. Tilskipunin eykur einnig getu hluthafa til að meta á tilhlýðilegan hátt áhættu og leiðir til þess að fjárfestingaráætlanir geti byggst á nákvæmum upplýsingum. Tilskipunin nær einnig til félaga utan ESB sem hafa dótturfélög eða útibú í ESB yfir ákveðnum stærðarmörkum.
Félögin þurfa m.a. að birta fyrir hvert land heildarveltu, hagnað eða tap fyrir skatt, greiddan tekjuskatt, áfallinn tekjuskatt, fjölda starfsmanna og uppsafnaðan hagnað. Skýrslan þarf að vera birt á heimasíðu félagsins eða í opinberri skrá, t.d. ársreikningaskrá eða fyrirtækjaskrá og vera aðgengileg í minnst fimm ár. Móðurfélag samstæðu ber ábyrgð á gerð skýrslunnar en ef móðurfélag er utan ESB getur dótturfélag eða útibú í ESB þurft að birta skýrsluna. Hvert ríki ákveður viðurlög við brotum og hvernig eftirlit sé framkvæmt.
Upptaka fyrrgreindrar tilskipunar í EES-samninginn og innleiðing hennar hér á landi kallar á breytingar á lögum um ársreikninga, nr. 3/2006. Fyrirhugað er að atvinnuvegaráðherra leggi fram frumvarp í þessu skyni á yfirstandandi löggjafarþingi.
Í fyrrgreindri ákvörðun sameiginlegu EES-nefndarinnar er gerð aðlögun á tilskipun (ESB) 2021/2101 sem er tæknilegs eðlis.
Hvorki er gert ráð fyrir auknum kostnaði fyrir ríkissjóð né einkaaðila.
Haft var samráð við utanríkismálanefnd um upptöku tilskipunarinnar í samræmi við reglur Alþingis um þinglega meðferð EES-mála og gerði hún ekki athugasemdir við upptöku gerðarinnar í EES-samninginn. Einnig var haft samráð við utanríkismálanefnd í aðdraganda fundar sameiginlegu EES-nefndarinnar þar sem umrædd ákvörðun var tekin og tilskipunin kynnt nefndinni sérstaklega.
6. Ákvörðun sameiginlegu EES-nefndarinnar nr. 310/2025 frá 5. desember 2025 um breytingu á XI. viðauka (Rafræn fjarskipti, hljóð- og myndmiðlun og upplýsingasamfélagið) við EES-samninginn.
Ákvörðun sameiginlegu EES-nefndarinnar nr. 310/2025 fellir inn í samninginn eftirfarandi gerðir:
a. Reglugerð Evrópuþingsins og ráðsins (ESB) 2021/1232 frá 14. júlí 2021 um tímabundna undanþágu frá tilteknum ákvæðum tilskipunar 2002/58/EB að því er varðar notkun veitenda fjarskiptaþjónustu milli einstaklinga, sem er ótengd númerum, á tækni til að vinna úr persónuupplýsingum og öðrum gögnum í þeim tilgangi að berjast gegn kynferðislegri misnotkun barna á netinu.
b. Reglugerð Evrópuþingsins og ráðsins (ESB) 2024/1307 frá 29. apríl 2024 um breytingu á reglugerð (ESB) 2021/1232 um tímabundna undanþágu frá tilteknum ákvæðum tilskipunar 2002/58/EB að því er varðar notkun veitenda fjarskiptaþjónustu milli einstaklinga, sem er ótengd númerum, á tækni til að vinna úr persónuupplýsingum og öðrum gögnum í þeim tilgangi að berjast gegn kynferðislegri misnotkun barna á netinu.
Markmið reglugerðanna og undanþágunnar frá fjarskiptaleynd, sem veitt er með þeim, er að gera þjónustuveitendum kleift að nýta tiltekna tækni við vinnslu persónuupplýsinga og annarra ópersónugreinanlegra upplýsinga, þegar hún telst vera nauðsynleg til að koma upp um kynferðisofbeldi gegn börnum á internetinu ásamt því að tilkynna um þannig athæfi og fjarlægja slík gögn. Reglugerðirnar gilda um fjarskipti ótengd númerum. Fjarskiptaþjónusta sem slík nær einnig yfir fjarskipti á milli einstaklinga sem eru ótengd númerum, sbr. 7. mgr. 2. gr. tilskipunar Evrópuþingsins og ráðsins (ESB) 2018/1972 frá 11. september 2018 um setningu evrópskra reglna um rafræn fjarskipti. Sú tilskipun er oft nefnd Kóðinn og var innleidd í íslenskan rétt með gildandi fjarskiptalögum.
Reglugerðirnar sem innleiða á í íslenskan rétt gilda því ekki um talsamband, þ.e. síma eða sms-skilaboð sem eru númeraháð fjarskipti. Reglugerðirnar gilda um svokallaða OTT-samskiptaþjónustu (e. over the top communication services), svo sem smáskilaboð á Microsoft Teams, Google, Facebook og Telegram, auk tölvupóstþjónustu, eins og Gmail og Outlook svo að dæmi séu nefnd.
Reglugerðin veitir einungis undanþágu frá meginreglunni um fjarskiptaleynd en veitir ekki lagagrundvöll fyrir vinnslu persónuupplýsinga við notkun greiningartækja. Kjósi þjónustuveitendur að nýta sér undanþáguna er þeim skylt að fara eftir reglugerð Evrópuþingsins og ráðsins (ESB) 2016/679 um vernd einstaklinga í tengslum við vinnslu persónuupplýsinga og um frjálsa miðlun slíkra upplýsinga og niðurfellingu tilskipunar 95/46/EB (almenna persónuverndarreglugerðin), sbr. lög um persónuvernd og vinnslu persónuupplýsinga, nr. 90/2018. Þjónustuveitendum er valkvætt en ekki skylt að skima fjarskiptaumferð samkvæmt reglugerðunum. Reglugerðirnar hafa sólarlagsákvæði og falla úr gildi 3. apríl 2028, eftir framlengingu.
Viðbúið er að kjósi fjarskiptafyrirtæki að skima samkvæmt lögunum verði þau fyrir einhverjum kostnaði við kaup á búnaði og við að forrita tæknilega högun í samræmi við staðla og tækniforskriftir í samræmi viðreglugerð Evrópusambandsins, en þar eru gerðar strangar kröfur um öryggi og mannlega íhlutun. Þar sem reglugerðin hefur verið í gildi innan ESB frá því árið 2021 má hins vegar búast við því að verð og uppsetning á umræddum búnaði hafi lækkað og að aðferðir séu þekktar og hafi verið prófaðar.
Í ákvörðun sameiginlegu EES-nefndarinnar nr. 310/2025 eru gerðar aðlaganir á 2. gr. reglugerðar 2021/1232 þar sem hugtakið barnaklám er sérstaklega skilgreint sem og klámfengin sýning.
Upptaka fyrrgreindra gerða í EES-samninginn og innleiðing þeirra hér á landi kallar á breytingar á lögum um fjarskipti, nr. 70/2022. Fyrirhugað er að innviðaráðherra leggi fram frumvarp í þessu skyni á yfirstandandi löggjafarþingi.
Breytingar á lögum um fjarskipti samkvæmt frumvarpinu munu ekki fela í sér aukinn kostnað fyrir stofnanir innviðaráðuneytisins. Að svo stöddu liggur ekki fyrir hvaða áhrif fyrirhugaðaðar breytingar muni hafa á aðrar stofnanir ríkisins, eins og Persónuvernd, lögreglu og ákæruvaldið. Líklegt verður að telja að umfangið muni rúmast innan fjárheimilda en fylgjast verður vel með framvindunni í málaflokkunum ákveði þjónustuveitendur að skima. Rétt er þó að benda á að lögreglan tekur þátt í erlendu samstarfi í barnaníðsmálum nú þegar vegna ábendinga erlendis frá.
Haft var samráð við utanríkismálanefnd um upptöku gerðanna í samræmi við reglur Alþingis um þinglega meðferð EES-mála og gerði hún ekki athugasemdir við upptöku gerðarinnar í EES-samninginn. Einnig var haft samráð við utanríkismálanefnd í aðdraganda fundar sameiginlegu EES-nefndarinnar þar sem umrædd ákvörðun var tekin og tilskipunin kynnt nefndinni sérstaklega.
7. Um upptöku ESB-gerða í EES-samninginn og um stjórnskipulegan fyrirvara.
Á hverju ári er nokkur fjöldi ESB-gerða tekinn upp í EES-samninginn með ákvörðunum sameiginlegu EES-nefndarinnar. Samkvæmt EES-samningnum skuldbinda ákvarðanir sameiginlegu EES-nefndarinnar aðildarríkin að þjóðarétti um leið og þær hafa verið teknar, nema eitthvert þeirra beiti heimild skv. 103. gr. EES-samningsins til að setja fyrirvara um að ákvörðun geti ekki orðið bindandi strax vegna stjórnskipulegra skilyrða heima fyrir. Viðkomandi aðildarríki hefur þá sex mánaða frest frá töku ákvörðunar í sameiginlegu nefndinni til að aflétta fyrirvaranum.
Almennt hafa íslensk stjórnvöld einungis gert stjórnskipulegan fyrirvara þegar innleiðing ákvörðunar kallar á lagabreytingar hér landi, en í því tilviki leiðir af 21. gr. stjórnarskrár lýðveldisins Íslands, nr. 33/1944, að afla ber samþykkis Alþingis áður en ákvörðun er staðfest. Slíkt samþykki getur Alþingi alltaf veitt samhliða viðeigandi lagabreytingu, en einnig hefur tíðkast að heimila stjórnvöldum að skuldbinda sig að þjóðarétti með þingsályktun áður en landsréttinum er með lögum breytt til samræmis við viðkomandi ákvörðun.
Áðurnefnd 21. gr. stjórnarskrárinnar tekur til gerðar þjóðréttarsamninga en hún á augljóslega einnig við um þau tilvik þegar breytingar eru gerðar á slíkum samningum. Samkvæmt ákvæðinu er samþykki Alþingis áskilið ef samningur felur í sér afsal eða kvaðir á landi eða landhelgi eða ef hann horfir til breytinga á stjórnarhögum ríkisins. Síðarnefnda atriðið hefur verið túlkað svo að samþykki Alþingis sé áskilið ef gerð þjóðréttarsamnings kallar á lagabreytingar hér á landi.
Umræddar ákvarðanir sameiginlegu EES-nefndarinnar fela í sér breytingar á EES-samningnum en þar sem þær kalla á lagabreytingar hér á landi voru þær teknar með stjórnskipulegum fyrirvara. Í samræmi við það sem að framan segir er óskað eftir samþykki Alþingis fyrir þeim breytingum á EES-samningnum sem í ákvörðununum felast.
Fylgiskjal I.
Ákvörðun sameiginlegu EES-nefndarinnar nr. 30/2024 frá 2. febrúar 2024 um breytingu á IX. viðauka (Fjármálaþjónusta) við EES-samninginn.
www.althingi.is/altext/pdf/157/fylgiskjol/s1031-f_I.pdf
Fylgiskjal II.
Reglugerð Evrópuþingsins og ráðsins (ESB) 2020/1503 frá 7. október 2020 um evrópska þjónustuveitendur hópfjármögnunar fyrir fyrirtæki, og um breytingu á reglugerð (ESB) 2017/1129 og tilskipun (ESB) 2019/1937.
www.althingi.is/altext/pdf/157/fylgiskjol/s1031-f_II.pdf
Fylgiskjal III.
Tilskipun Evrópuþingsins og ráðsins (ESB) 2020/1504 frá 7. október 2020 um breytingu á tilskipun 2014/65/ESB um markaði fyrir fjármálagerninga.
www.althingi.is/altext/pdf/157/fylgiskjol/s1031-f_III.pdf
Fylgiskjal IV.
Framseld reglugerð (ESB) 2022/1988 frá 12. júlí 2022 um framlengingu á umbreytingartímabilinu til að veita áfram hópfjármögnunarþjónustu í samræmi við landslög eins og um getur í 1. mgr. 48. gr. reglugerðar Evrópuþingsins og ráðsins (ESB) 2020/1503.
www.althingi.is/altext/pdf/157/fylgiskjol/s1031-f_IV.pdf
Fylgiskjal V.
Ákvörðun sameiginlegu EES-nefndarinnar nr. 68/2025 frá 14. mars 2025 um breytingu á IX. viðauka (Fjármálaþjónusta) við EES-samninginn.
www.althingi.is/altext/pdf/157/fylgiskjol/s1031-f_V.pdf
Fylgiskjal VI.
Tilskipun Evrópuþingsins og ráðsins (ESB) 2021/2118 frá 24. nóvember 2021 um breytingu á tilskipun 2009/103/EB um ábyrgðartryggingu vegna notkunar vélknúinna ökutækja og um að fylgja því eftir að vátrygging vegna slíkrar ábyrgðar sé tekin.
www.althingi.is/altext/pdf/157/fylgiskjol/s1031-f_VI.pdf
Fylgiskjal VII.
Ákvörðun sameiginlegu EES-nefndarinnar nr. 158/2025 frá 13. júní 2025 um breytingu á XXII. viðauka (Félagaréttur) við EES-samninginn.
www.althingi.is/altext/pdf/157/fylgiskjol/s1031-f_VII.pdf
Fylgiskjal VIII.
Framseld tilskipun framkvæmdastjórnarinnar (ESB) 2023/2775 frá 17. október 2023 um breytingu á tilskipun Evrópuþingsins og ráðsins 2013/34/ESB að því er varðar breytingar á stærðarviðmiðunum fyrir örfyrirtæki, lítil, meðalstór og stór fyrirtæki eða samstæður.
www.althingi.is/altext/pdf/157/fylgiskjol/s1031-f_VIII.pdf
Fylgiskjal IX.
Ákvörðun sameiginlegu EES-nefndarinnar nr. 159/2025 frá 13. júní 2025 um breytingu á XXII. viðauka (Félagaréttur) við EES-samninginn.
www.althingi.is/altext/pdf/157/fylgiskjol/s1031-f_IX.pdf
Fylgiskjal X.
Tilskipun Evrópuþingsins og ráðsins (ESB) 2021/2101 frá 24. nóvember 2021 um breytingu á tilskipun 2013/34/ESB að því er varðar birtingu tekjuskattsupplýsinga af hálfu tiltekinna fyrirtækja og útibúa.
www.althingi.is/altext/pdf/157/fylgiskjol/s1031-f_X.pdf
Fylgiskjal XI.
Ákvörðun sameiginlegu EES-nefndarinnar nr. 310/2025 frá 5. desember 2025 um breytingu á XI. viðauka (Rafræn fjarskipti, hljóð- og myndmiðlun og upplýsingasamfélagið) við EES-samninginn.
www.althingi.is/altext/pdf/157/fylgiskjol/s1031-f_XI.pdf
Fylgiskjal XII.
Reglugerð Evrópuþingsins og ráðsins (ESB) 2021/1232 frá 14. júlí 2021 um tímabundna undanþágu frá tilteknum ákvæðum tilskipunar 2002/58/EB að því er varðar notkun veitenda fjarskiptaþjónustu milli einstaklinga, sem er ótengd númerum, á tækni til að vinna úr persónuupplýsingum og öðrum gögnum í þeim tilgangi að berjast gegn kynferðislegri misnotkun barna á netinu.
www.althingi.is/altext/pdf/157/fylgiskjol/s1031-f_XII.pdf
Fylgiskjal XIII.
Reglugerð Evrópuþingsins og ráðsins (ESB) 2024/1307 frá 29. apríl 2024 um breytingu á reglugerð (ESB) 2021/1232 um tímabundna undanþágu frá tilteknum ákvæðum tilskipunar 2002/58/EB að því er varðar notkun veitenda fjarskiptaþjónustu milli einstaklinga, sem er ótengd númerum, á tækni til að vinna úr persónuupplýsingum og öðrum gögnum í þeim tilgangi að berjast gegn kynferðislegri misnotkun barna á netinu.
