Ferill 628. máls. Aðrar útgáfur af skjalinu: PDF - Word Perfect.

---

157. löggjafarþing 2025–2026.
Þingskjal 1089  —  628. mál.

Beiðni um skýrslu

frá fjármála- og efnahagsráðherra um styttingu vinnuvikunnar.

Frá Guðlaugi Þór Þórðarsyni, Bryndísi Haraldsdóttur, Diljá Mist Einarsdóttur, Guðrúnu Hafsteinsdóttur, Jens Garðari Helgasyni, Jóni Gunnarssyni, Jóni Pétri Zimsen, Njáli Trausta Friðbertssyni, Ólafi Adolfssyni, Rósu Guðbjartsdóttur, Sigurði Erni Hilmarssyni, Tómasi Þór Þórðarsyni, Vilhjálmi Árnasyni og Þórdísi Kolbrúnu Reykfjörð Gylfadóttur.

    Með vísan til 54. gr. stjórnarskrárinnar og 54. gr. laga um þingsköp Alþingis er þess óskað að fjármála- og efnahagsráðherra flytji Alþingi skýrslu um styttingu vinnuvikunnar. Í skýrslunni verði gerð grein fyrir:
     a.      árlegum kostnaði ríkissjóðs vegna styttingar vinnuvikunnar, sundurliðað eftir ráðuneytum, málaflokkum og undirstofnunum,
     b.      fjölgun stöðugilda vegna styttingarinnar og þeim kostnaði sem hlotist hefur af þeirri fjölgun, sundurliðað eftir ráðuneytum, málaflokkum og undirstofnunum fyrir hvert ár.

Greinargerð.

    Við undirritun kjarasamninga ríkisins við BSRB var samið um styttingu vinnuvikunnar. Farið var í tilraunaverkefni 2019–2020 en styttingin kom almennt til framkvæmda 2020– 2021. Styttingin var hluti af víðtækum breytingum á vinnumarkaði hjá hinu opinbera og síðar á almennum vinnumarkaði. Þrátt fyrir umfang breytingarinnar liggur ekki fyrir heildstætt mat á kostnaði hennar fyrir ríkissjóð né áhrifum á fjölda stöðugilda. Mikilvægt er að Alþingi fái skýra yfirsýn yfir fjárhagsleg áhrif styttingarinnar sem hefur haft áhrif á rekstur hins opinbera og ráðstöfun skattfjár.