Ferill 583. máls. Aðrar útgáfur af skjalinu: PDF - Word Perfect.
157. löggjafarþing 2025–2026.
Þingskjal 1102 — 583. mál.
Svar
félags- og húsnæðismálaráðherra við fyrirspurn frá Fidu Abu Libdeh um innflytjendur og atvinnustefnu ríkisstjórnarinnar.
Fyrirspurnin hljóðar svo:
1. Telur ráðherra tilefni til að samþætta áherslu á aukið framboð á íslenskunámi og frekari stuðning fyrir innflytjendur við boðaða atvinnustefnu stjórnvalda með það að markmiði að efla þátttöku innflytjenda á vinnumarkaði og auka verðmætasköpun í landinu?
2. Hvaða aðgerðir eru fyrirhugaðar til að brúa það bil sem er milli Íslands og OECD-ríkja í kunnáttu innflytjenda í máli heimamanna og hvenær má búast við að þær aðgerðir komi til framkvæmda?
3. Hvernig hyggst ráðherra tryggja að innflytjendur verði sérstaklega hafðir í huga við mótun og framkvæmd atvinnustefnunnar þannig að hún þjóni tilgangi sínum fyrir alla íbúa landsins?
Atvinnustefna Íslands, sem kynnt var 10. apríl 2026, er á forræði forsætisráðuneytis en gert er ráð fyrir að unnið verði að aðgerðum stefnunnar og eftirfylgni með þeim þvert á ráðuneyti undir forystu þess ráðuneytis.
Félags- og húsnæðismálaráðherra hefur mælt fyrir tillögu til þingsályktunar um framkvæmdaáætlun í málefnum innflytjenda fyrir árin 2026–2029, sbr. 7. gr. laga um málefni innflytjenda, nr. 116/2012. Í fyrirhugaðri framkvæmdaáætlun er lögð áhersla á að styrkja stöðu innflytjenda á íslenskum vinnumarkaði, meðal annars með aðgerðum sem stuðla eiga að mati á fyrri menntun og starfsreynslu innflytjenda til starfsréttinda hér á landi. Enn fremur er gert ráð fyrir að unnið verði að jöfnun tækifæra og fræðslu um réttindi og skyldur á vinnumarkaði hér á landi.
Þá er í fyrirhugaðri framkvæmdaáætlun gert ráð fyrir fimm aðgerðum sem sérstaklega miða að því að aðgengi innflytjenda að íslenskunámi og gæði íslenskukennslu verði aukin, auk þess sem hvatt er til notkunar tungumálsins í samskiptum innflytjenda og innlendra. Ein þessara aðgerða er þróunarverkefni um íslenskunám fyrir innflytjendur sem er vaktavinnufólk og innflytjendur sem ekki hafa aðgang að barnagæslu. Gert er ráð fyrir að fyrst um sinn verði horft til svæða þar sem hlutfall innflytjenda er hátt og atvinnulíf með þeim hætti að vaktavinna er algeng.
