Ferill 645. máls. Aðrar útgáfur af skjalinu: PDF - Word Perfect.
157. löggjafarþing 2025–2026.
Þingskjal 1163 — 645. mál.
Fyrirspurn
til heilbrigðisráðherra um veitingu sérfræðileyfa, mönnun í undirsérgreinum og mat á erlendu sérnámi lækna.
Frá Ingibjörgu Isaksen.
1. Hvenær hyggst ráðherra leggja fram breytingar á reglugerð nr. 856/2023 eða öðrum stjórnvaldsfyrirmælum í samræmi við þá opinberu viðurkenningu stjórnvalda að þörf sé á skýrari viðmiðum um mat á erlendu sérnámi?
2. Hyggst ráðherra setja bráðabirgðaviðmið eða notast við önnur tímabundin úrræði á meðan endurskoðun reglugerðarinnar stendur yfir, svo tryggt sé að umsóknir sitji ekki í óvissu og að mat taki raunhæft mið af klínískri reynslu og þeim sérnámsleiðum sem tíðkast annars staðar á Norðurlöndum og í Bandaríkjunum?
3. Hvernig hyggst ráðherra tryggja að regluverk og framkvæmd þess styðji við mönnun í viðkvæmum undirsérgreinum, þar á meðal í þjónustu við börn, í ljósi þess að menntun sérfræðilækna tekur langan tíma og að stjórnvöld hafa sjálf viðurkennt þörf á bættri yfirsýn og stýringu á sérnámi?
4. Hvernig hyggst ráðherra tryggja að framkvæmd reglugerðar nr. 856/2023 við veitingu sérfræðileyfa lækna leiði ekki til þess að læknar sem hafa aflað sér viðurkenndrar sérmenntunar erlendis, einkum í undirsérgreinum sem ekki eru sjálfstætt löggiltar í námslandi, fái ósamræmt eða ósanngjarnt mat á menntun sinni við heimkomu til Íslands?
5. Hefur ráðherra upplýsingar um umfang tafa, synjana eða mismunandi niðurstaðna við afgreiðslu umsókna um sérfræðileyfi og undirsérgreinaleyfi á grundvelli núgildandi reglugerðar? Ef svo er, hyggst ráðherra birta þær upplýsingar?
6. Telur ráðherra að núverandi framkvæmd samræmist jafnræðisreglu stjórnsýsluréttar og kröfum um málefnalega og samræmda úrlausn sambærilegra mála, í ljósi þess að dæmi hafa verið um að læknar með sambærilega menntun og reynslu hafi fengið ólíkar niðurstöður?
Skriflegt svar óskast.
