Ferill 552. máls. Aðrar útgáfur af skjalinu: PDF - Word Perfect.

---

157. löggjafarþing 2025–2026.
Þingskjal 1365  —  552. mál.

Svar

umhverfis-, orku- og loftslagsráðherra við fyrirspurn frá Þórdísi Kolbrúnu Reykfjörð Gylfadóttur um stafrænt fullveldi Íslands.

     1.      Hvaða gagnavinnsla og gagnageymsla á vegum ráðuneytisins er í skýjum erlendra fyrirtækja? Óskað er eftir upplýsingum um hvort um er að ræða evrópsk fyrirtæki eða bandarísk.
    Sameiginlegar skýjalausnir ráðuneytanna byggjast að verulegu leyti á þjónustu Microsoft. Fyrst og fremst er um að ræða lausnir innan skrifstofuhugbúnaðarsvítunnar Microsoft 365. Dæmi um lausnir innan Microsoft 365 eru Outlook, Word, Excel, PowerPoint, Teams o.s.frv. sem eru nýttar í daglegum rekstri.
    Helstu kerfi ráðuneytisins eru eftirfarandi:

Hugbúnaður/kerfi	Fyrirtæki	Höfuðstöðvar fyrirtækis	Gögn vistuð	Heimilisfang endanlegra eigenda
Microsoft 365	Microsoft Írland	BNA	EES	BNA
Málaskrá	Hugvit	Ísland	Ísland	Ísland

     2.      Hvaða gögn á vegum ráðuneytisins eru geymd í skýjum erlendra fyrirtækja? Óskað er eftir upplýsingum um hvort um er að ræða evrópsk fyrirtæki eða bandarísk.
    Gögn ráðuneytanna sem hýst eru í skýjalausnum erlendra þjónustuaðila eru fyrst og fremst tilkomin vegna almennra daglegra starfa. Þetta eru til að mynda tölvupóstar, skjöl, samskiptagögn, dagatöl, skrár og önnur rekstrargögn sem verða til í daglegri starfsemi.

     3.      Hefur ráðuneytið skilgreint stafrænt fullveldi í netmiðlun þess?
    Nei, ráðuneytið hefur ekki sett fram slíka skilgreiningu.

     4.      Er rótarfang, vefur, póstþjónn eða nafnaþjónn ráðuneytisins og undirstofnana skráður á Íslandi?
    Upplýsingar um skráningu rótarfangs, vefs, póstþjóns og nafnaþjóns ráðuneytisins og stofnana þess má nálgast í meðfylgjandi töflu.

Stofnun	Rótarfang	Vefur	Póstþjónn	Nafnaþjónn
Umhverfis-, orku- og loftslagsráðuneytið	Já	Já	Já	Já
Land og skógur	Já	Nei	Nei	Nei
Minjastofnun Íslands	Já	Nei	Nei	Já
Náttúrufræðistofnun	Já	Nei	Nei	Nei
Náttúruverndarstofnun	Já	Nei	Nei	Já
Umhverfis- og orkustofnun	Já	Já	Nei	Já
Úrskurðarnefnd umhverfis- og auðlindamála	Já	Já	Nei	Nei
Úrvinnslusjóður	Já	Já	Nei	Já
Veðurstofa Íslands	Já	Nei	Nei	Já

     5.      Hefur verið tryggt innan ráðuneytisins að tölvupóstur sé virkur ef samband rofnar við útlönd?
    Til er viðbragðsáætlun til að tryggja tölvupóstsamskipti ef samband við útlönd rofnar. Þorri tölvupóstþjónustu stjórnvalda er í skýjalausnum utan Íslands og viðbragðsáætlunin tekur mið af tveimur meginsviðsmyndum:
    Ef hefðbundið netsamband um sæstrengi dettur út hefur Umbra, í samstarfi við Farice, komið á varaleið um gervihnetti sem þegar er komin í prófanir. Þessi leið tryggir að bæði innlend og erlend tölvupóstsamskipti haldi áfram án verulegs rofs. Til lengri tíma litið hefur Ísland einnig tryggt sér aðgang að öruggum fjarskiptatengingum í gegnum gervihnattakerfi Evrópusambandsins sem styrkir þessar varnir enn frekar.
    Ef allt samband rofnar við útlönd, þ.m.t. gervihnattasamband, fellur tenging við skýjalausnir erlendis niður. Í þeirri sviðsmynd tekur við viðbragðsáætlun um að endurreisa staðbundið póstkerfi sem byggist á gagnaafritum sem hýst eru á Íslandi. Slík endurreisn tryggir innlenda tölvupóstþjónustu milli ráðuneytanna og annarra innlendra aðila.