Ferill 710. máls. Aðrar útgáfur af skjalinu: PDF - Word Perfect.
157. löggjafarþing 2025–2026.
Þingskjal 1383 — 710. mál.
Fyrirspurn
til fjármála- og efnahagsráðherra um staðsetningu starfa hjá ríkinu.
Frá Örnu Láru Jónsdóttur.
1. Hver hefur þróun fjölda starfa hjá ríkinu verið frá árinu 2016, sundurliðað eftir árum, ráðuneytum og ríkisstofnunum?
2. Hversu mörg ný stöðugildi og störf hafa orðið til hjá ríkinu á fyrrgreindu tímabili og hvernig skiptast þau milli stjórnunarstarfa, sérfræðistarfa og almennra starfa? Svar við 1. og 2. tölul. fyrirspurnarinnar óskast sundurliðað eftir:
a. Landshlutum þar sem höfuðborgarsvæðið er sérstakur landshluti.
b. Sveitarfélögum á höfuðborgarsvæðinu.
c. Landinu öllu án áhrifasvæðis höfuðborgarinnar (svæðið frá Hvítá í Borgarfirði í vestri að Hvítá í Árnessýslu í austri).
3. Hefur ráðherra íhugað að leggja fram frumvarp til laga sem kveður á um að binda störf hjá ríkinu ákveðnum landshlutum með því að skilyrða störfin við tiltekna staðsetningu? Í því samhengi er átt við störf sem krefjast staðbundinnar viðveru á vinnustað.
4. Hefur verið skoðað að setja mælikvarða um fjölda starfa eftir landshlutum og meðallaunum inn í ársskýrslur opinberra stofnana og ráðuneyta?
5. Kemur til greina af hálfu ráðherra að leggja til með frumvarpi til laga hámark á stöðugildi ákveðinna landshluta? Til dæmis höfuðborgarsvæðið?
6. Hvernig telur ráðherra, með tilliti til stefnumótunar í mannauðsmálum ríkisins, að gengið hafi að fylgja eftir markmiðinu um óstaðbundin störf sem sett var í lið B.7 í stefnumótandi byggðaáætlun fyrir árin 2022–2036.
Skriflegt svar óskast.
