Ferill 693. máls. Aðrar útgáfur af skjalinu: PDF - Word Perfect.

157. löggjafarþing 2025–2026.
Þingskjal 1538  —  693. mál.



Svar


fjármála- og efnahagsráðherra við fyrirspurn frá Guðmundi Ara Sigurjónssyni um verðþróun á eldsneyti.


     1.      Hvert var meðalverð á bensíni og dísilolíu á almennum eldsneytismarkaði á tímabilinu 24.–31. maí sl.?
    Á vormánuðum samþykkti Alþingi breytingar á lögum um virðisaukaskatt og á samkeppnislögum. Markmið lagasetningarinnar var að bregðast við verðhækkunum og óvissu á eldsneytismörkuðum vegna stríðsátaka í Miðausturlöndum. Með tímabundinni lækkun skatthlutfalls á eldsneyti á tímabilinu 1. maí til 31. ágúst var leitast við að draga úr áhrifum hækkandi heimsmarkaðsverðs.
    Fjármála- og efnahagsráðuneyti safnar ekki upplýsingum frá eldsneytissölum um útsöluverð og sinnir ekki verðlagseftirliti á eldsneytismarkaði. Upplýsingar um skráð verð á einstökum sölustöðum eru hins vegar aðgengilegar almenningi á vefnum gasvaktin.is.
    Í töflu 1 má sjá einfalt meðaltal samkvæmt vefsíðunni fyrir dagana 24.–31. maí 2026.

Tafla 1. Meðalverð 24.–31. maí 2026.
Bensín 95 227,7 kr.
Bensín 95 með afslætti 221,2 kr.
Bensín allt 224,8 kr.
Dísilolía 262,9 kr.
Dísilolía með afslætti 255,3 kr.
Dísilolía allt 259,4 kr.

     2.      Hvert væri meðalverð á bensíni og dísilolíu á almennum eldsneytismarkaði á sama tímabili hefði Alþingi ekki lækkað virðisaukaskatt á eldsneyti með lögum nr. 34/2026 og breytt ýmsum gjöldum á eldsneyti í tengslum við innleiðingu á kílómetragjaldi?
    Ekki er unnt að segja með vissu hvert markaðsverð eldsneytis hefði orðið við aðrar skattalegar forsendur. Slíkt verð er ekki mælanlegt eftir á og hefði m.a. getað ráðist af viðbrögðum seljenda og neytenda. Unnt er að leggja mat á bein reiknuð áhrif skattbreytinganna að gefnum tilteknum forsendum.
    Við innleiðingu kílómetragjalds með lögum nr. 100/2025 voru vörugjöld af eldsneyti felld niður en kolefnisgjald hækkað. Áður námu vörugjöld af bensíni 90,2 kr. á lítra og olíugjald 77,3 kr. á lítra. Kolefnisgjald hækkaði við breytingarnar um 5,65 kr. á lítra bensíns og 6,9 kr. á lítra dísilolíu. Nettóbreyting gjalda án virðisaukaskatts er því 84,55 kr. á lítra bensíns og 70,4 kr. á lítra dísilolíu. Við síðustu áramót voru krónutölugjöld hækkuð um 3,7% sem hefði einnig gilt um gjöld á eldsneyti ef ekki hefði komið til kerfisbreytingarinnar. Með fyrirvara
um íblöndun, álagningu og út frá því verði sem gefið er upp í töflu 1 má gera ráð fyrir því að verð eldsneytis, ef ekki hefði verið gripið til breytinga á gjöldum sem tengjast verði eldsneytis, hefði verið mun hærra en ella. Mismunur á verði í töflu 1 og töflu 2 er frá 120 til 135 kr. á lítra.

Tafla 2. Meðalverð 24.–31. maí 2026 án gjaldabreytinga.
Bensín 95 363,1 kr.
Bensín 95 með afslætti 355,9 kr.
Bensín allt 359,8 kr.
Dísilolía 384,2 kr.
Dísilolía með afslætti 375,7 kr.
Dísilolía allt 380,3 kr.