Ferill 194. máls. Aðrar útgáfur af skjalinu: PDF - Word Perfect.
158. löggjafarþing 2026–2027.
Þingskjal 201 — 194. mál.
Fyrirspurn
til dómsmálaráðherra um framkvæmd nýs fyrirkomulags jafnlaunamála.
Frá Ragnhildi Jónsdóttur.
1. Hefur ráðuneytið metið hvort kröfur sem leiðir af reglugerð nr. 946/2026 og framkvæmd hennar séu í samræmi við þau markmið sem lágu að baki breytingum á fyrirkomulagi jafnlaunamála með lögum nr. 53/2026, m.a. hvað varðar einfaldari framkvæmd og minni kostnað og stjórnsýslu fyrir fyrirtæki og stofnanir? Ef svo er, hver var niðurstaða þess mats?
2. Á hvaða lagaheimild byggist sú krafa við framkvæmd reglugerðar nr. 946/2026 að við starfaflokkun séu notuð sömu viðmið og mælikvarðar á öll störf og að atvinnurekandi ákvarði hlutfallslegt vægi einstakra viðmiða?
3. Var lagt mat á kostnað og vinnuframlag sem fyrirtæki og stofnanir þurfa að leggja í starfaflokkun, launagreiningu og eftir atvikum gerð úrbótaáætlunar samkvæmt nýju fyrirkomulagi áður en reglugerð nr. 946/2026 tók gildi? Ef svo er, hver var niðurstaðan og hvernig ber áætlað umfang þeirrar vinnu saman við fyrra fyrirkomulag jafnlaunavottunar og jafnlaunastaðfestingar?
4. Hvaða faglegu og aðferðafræðilegu sjónarmið lágu að baki ákvörðun um 3,9% viðmið í reglugerð nr. 946/2026? Á hvaða forsendum er niðurstaða rannsóknar Hagstofu Íslands á leiðréttum launamun kvenna og karla á vinnumarkaðnum í heild lögð til grundvallar við launagreiningu einstakra fyrirtækja og stofnana þegar aðferðafræði mælinganna er ólík?
5. Hvernig verður við framkvæmd og mat á árangri hins nýja fyrirkomulags tekið tillit til þess að tölfræðilegur launamunur kynjanna geti átt sér aðrar skýringar en launamismunun á grundvelli kyns fyrir sömu eða jafn verðmæt störf?
Skriflegt svar óskast.
