Ferill 196. máls. Aðrar útgáfur af skjalinu: PDF - Word Perfect.
158. löggjafarþing 2026–2027.
Þingskjal 203 — 196. mál.
Fyrirspurn
til innviðaráðherra um farnetsþjónustu eftir útfösun 2G- og 3G-netkerfa.
Frá Ingveldi Önnu Sigurðardóttur.
1. Hefur ráðherra fengið og brugðist við kvörtunum eða ábendingum um skert farsímasamband í kjölfar útfösunar 2G- og 3G-farnetskerfa?
2. Hefur ráðherra íhugað hvort tilefni sé til aðkomu hins opinbera með skattalegum hvötum til að styrkja uppbyggingu og rekstur almennrar fjarskiptaþjónustu með einhverjum hætti á svæðum þar sem getur ríkt markaðsbrestur og farnetsþjónusta verið skert?
3. Hefur ráðherra í hyggju að láta framkvæma heildaráhættumat á fjarskiptasambandi og neyðarþjónustu á landinu öllu í kjölfar útfösunarinnar?
Skriflegt svar óskast.
Greinargerð.
Í skýrslu Fjarskiptastofu frá september 2026 um útfösun 2G- og 3G-farnetskerfa kemur fram að lokun eldri farnetskerfa geti haft í för með sér ýmsar áskoranir sem eru af tæknilegum, viðskiptalegum og samfélagslegum toga. Ábendingar hafi m.a. borist um skert farsímasamband í dreifbýli. Almenn farnetsþjónusta er samkvæmt skýrslunni í raun orðin órjúfanlegur hluti af þátttöku almennings í samfélaginu og er starfrækt á markaðslegum forsendum á ábyrgð einkaaðila. Í fámennu og strjálbýlu landi eru aftur á móti svæði þar sem getur ríkt markaðsbrestur og farnetsþjónusta verið skert.
