Ferill 227. máls. Aðrar útgáfur af skjalinu: PDF - Word Perfect.
158. löggjafarþing 2026–2027.
Þingskjal 352 — 227. mál.
Svar
mennta- og barnamálaráðherra við fyrirspurn frá Berglindi Hörpu Svavarsdóttur um fjölgun hjúkrunarrýma á Egilsstöðum.
1. Hvernig telur ráðherra að fyrirhuguð fjölgun um tíu hjúkrunarrými á Austurlandi muni mæta núverandi þörf og til framtíðar fyrir hjúkrunarrými í landshlutanum?
Í framkvæmdaáætlun um uppbyggingu hjúkrunarheimila 2026–2030 sem gefin var út í mars sl. er gert ráð fyrir tuttugu nýjum hjúkrunarrýmum á Austurlandi. Áformin byggjast á þarfagreiningu heilbrigðisráðuneytisins, sem hefur frá árinu 2021 metið árlega þörf fyrir hjúkrunarrými í hverju heilbrigðisumdæmi. Við greininguna er stuðst við mannfjöldaspár Hagstofu Íslands og gögn frá embætti landlæknis um aldursdreifingu og dvalartíma íbúa á hjúkrunarheimilum, auk biðtíma eftir úthlutun hjúkrunarrýma. Er með vísan til framangreinds gert ráð fyrir að fyrirhuguð fjölgun hjúkrunarrýma mæti núverandi þörf og einnig þörf til framtíðar miðað við þær forsendur sem fyrir hendi eru í dag. Nánar er fjallað um forsendur þarfagreiningarinnar í 4. kafla framkvæmdaáætlunar um uppbyggingu hjúkrunarheimila fyrir árabilið 2026–2030. 1
2. Mun ráðherra beita sér fyrir því að tryggja fjármögnun og framkvæmdir við fjölgun hjúkrunarrýma í Dyngju á Egilsstöðum með byggingu þriðju hæðar húsnæðisins? Ef svo er, hvenær er áætlað að framkvæmdir hefjist?
Samkvæmt áðurnefndri framkvæmdaáætlun er gert ráð fyrir að hjúkrunarrýmum í heilbrigðisumdæminu fjölgi um tuttugu með stækkun hjúkrunarheimilisins Hulduhlíðar á Eskifirði. Unnið er samkvæmt þeirri áætlun og er ekki fyrirhugað að fjölga rýmum umfram það í heilbrigðisumdæmi Austurlands að svo stöddu.
1 www.stjornarradid.is/library/01-Frettatengt-myndir-og-skrar/FRN/Framkvaemdaaetlun_um_uppbyggingu_hjukrunarheimila_2026-2030.pdf
