ÞINGSETNINGARFUNDUR
þriðjudaginn 13. september 2022
kl. 2 miðdegis.
Árið 2022, þriðjudaginn 13. september, var hundrað fimmtugasta og þriðja löggefandi Alþingi sett í Reykjavík. Er það hundrað tuttugasta og sjötta aðalþing í röðinni en hundrað sextugasta og níunda samkoma frá því er Alþingi var endurreist.
Forseti Íslands, biskup Íslands, forseti Alþingis, ráðherrar og alþingismenn gengu fylktu liði til kirkjunnar úr Alþingishúsinu. Séra Hildur Eir Bolladóttir, prestur í Akureyrarkirkju, predikaði og biskup Íslands, frú Agnes M. Sigurðardóttir, og séra Elínborg Sturludóttir, prestur í Dómkirkjunni, þjónuðu fyrir altari.
Að lokinni guðsþjónustu gengu þingmenn aftur til Alþingishússins, fundarsalar Alþingis.
Þessir menn skipuðu þingið:
forseti Íslands setur þingið.
Þá er þingmenn höfðu skipað sér til sætis gekk forseti Íslands, Guðni Th. Jóhannesson, til ræðustóls og las forsetabréf um að Alþingi skuli koma saman þriðjudaginn 13. september.
Forseti lýsti yfir að Alþingi Íslendinga væri sett samkvæmt bréfi því sem hann hafði lesið.
Forseti ávarpaði því næst alþingismenn. Við lok ávarpsins stóð þingheimur upp og forsætisráðherra, Katrín Jakobsdóttir, mælti: ,,Heill forseta vorum og fósturjörð. Ísland lifi." Tóku þingmenn undir þessi orð með ferföldu húrrahrópi.
Graduale Nobili söng Vökuró. Lag: Jórunn Viðar. Ljóð: Jakobína Sigurðardóttir.
minnst látins fyrrverandi alþingismanns, Árna Gunnarssonar.
Forseti minntist Árna Gunnarssonar, fyrrverandi alþingismanns, sem lést 1. júlí sl.
minnst látins fyrrverandi alþingismanns, Ingvars Gíslasonar.
Forseti minntist Ingvars Gíslasonar, fyrrverandi alþingismanns, sem lést 17. ágúst sl.
