fjárlög 2026.

Virðulegi forseti. Ég vil þakka þingmanninum ræðuna. Ég tek eftir þessum myrka tón sem er í máli hans þegar hann lýsir þeirri stöðu sem við er að glíma í fjármálum hins opinbera en vildi gleðja þingmanninn, því að þvert á það sem kom fram í máli hans um að nú ætti að hækka skuldir þá kemur býsna skýrt fram að við erum að fara úr því að skuldir ríkissjóðs mældust 59,3% af landsframleiðslu í fyrra en á næsta ári verða skuldir ríkissjóðs 50,9%. Skuldalækkunin er með öðrum orðum í kringum 9%, sem er gríðarlega mikið og tengist þeim aðgerðum sem fóru í gegnum þingið í vor, m.a. sölu Íslandsbanka, en líka því að hér er verið að vinna eftir góðu plani.

Mér fannst svo forvitnileg söguskoðun að tala um það að kílómetragjöldunum hafa verið hafnað. Í fyrsta lagi hafa nú verið kílómetragjöld a.m.k. síðustu tíu ár, lægri en ráð var fyrir gert í frumvarpi fráfarandi ríkisstjórnar, sem var meira að segja frestað fram yfir kosningar frekar en hafnað. Ég vildi þess vegna spyrja þingmanninn út í málflutning samþingmanns hans, Jóns Gunnarssonar, í Morgunblaðinu í gær þar sem hann dregur fram að á síðasta ári voru tekjur af farartækjum 21,8 milljarðar en útgjöldin 51,4 milljarðar. Jón Gunnarsson rökstyður að það þurfi veggjöld og auknar tekjur til að standa undir innviðauppbyggingu. Er þingmaðurinn sammála þessu eða ósammála og hvaða leiðir leggur hann til?