fjárlög 2026.

Virðulegi forseti. Ríkisstjórnin leggur til að krónugjöld hækki í takt við verðbólgu og við erum búin að ræða hér þó nokkuð um krónutölugjöld. Það þýðir t.d. hærri álögur á eldsneyti og bifreiðatengd gjöld, áfengis- og tóbaksgjöld og útvarpsgjald. Slíkar hækkanir fara beint út í verðlag og auka kostnað bæði heimila og fyrirtækja. Ef markmiðið er að vinna verðbólgu niður og skapa rými fyrir vaxtalækkanir á ríkið sjálft ekki að setja viðbótarþrýsting á verðbólguna. Sjálfstæðisflokkurinn leggur til hófsemi og skýra forgangsröðun. Í fyrsta lagi að stilla hækkun krónutölugjalda lægra á næsta ári, nær verðbólgumarkmiði Seðlabanka Íslands, í stað þess að fylgja spám í einu og öllu. Í öðru lagi að undanskilja eldsneyti og bifreiðatengd gjöld, útvarpsgjöld og önnur krónutölugjöld frá almennri verðlagsuppfærslu á þessu tímabili. Þetta snýst líka um trúverðugleika. Þegar almenningi er sagt að búa sig undir sjálfvirkar hækkanir á gjöldum á sami metnaður að gilda um aðhald í öðrum liðum ríkisrekstrar. Forsenda trausts er að ríkið sýni að það byrjar á eigin kostnaði og sýnir varfærni áður en það sækir meira í vasa fólks.

Ég spyr því hæstv. forsætisráðherra: Er hún reiðubúin að styðja hófstillta hækkun krónutölugjalda á árinu 2026, nálægt verðbólgumarkmiði, og veita tímabundnar undanþágur fyrir krónutengd gjöld og mun hún beita sér fyrir varanlegri reglu sem heldur þessum gjöldum í skynsamlegum skorðum þannig að ríkissjóður ýti ekki undir verðbólgu heldur styðji við lægri vexti, stöðugleika og traust?