fjárlög 2026.
Virðulegi forseti. Ég þakka hv. þingmanni fyrir andsvarið. Ég get tekið undir það að það er margt sem byrjar hjá manni sjálfum. En kannski bara til að skerpa aðeins á boðskapnum þá tel ég að við þurfum, og ekki seinna en í þessu fjárlagafrumvarpi og til næstu ára og sennilega næstu kjörtímabila, að hafa samfellda áætlun um fjárfestingu í þessum innviðum, á jafn alvarlegan og brýnan máta og við lítum á aðrar innviðafjárfestingar. Þetta er eitthvað sem bindur okkur saman. Ég hef búið í ólíkum löndum þar sem ekki var fjárfest í samheldni þegar miklar samfélagsbreytingar urðu og það er yfirleitt þannig að það verða áskoranir í annarri og þriðju kynslóð. Ég sé núna að við verðum að þétta raðirnar og líta á þetta sem raunverulegt og áþreifanlegt fjárfestingarmál ekki seinna en í dag. Við eigum að horfa á þetta eins og brýrnar, þær eiga að þjóna okkur næstu 100 árin, þær eru dýrar núna — þetta er eitthvað sem má ekki bíða.
En síðan vil ég líka segja bara almennt um fjárlagafrumvarpið: Það er auðvitað þannig að það eru ólíkar ríkisstjórnir og mér finnst gott að horfa á þetta með þeim augum að það eru ólíkar áskoranir sem koma fram. Stundum er hægt að vera í einhverju rosalegu snjóboltakasti en vissulega er það þannig að það voru stórar áskoranir, t.d. náttúruhamfarir, á síðasta kjörtímabili og blessunarlega og vonandi þurfum við ekki að takast á við slíkt á þessu kjörtímabili. Ég segi líka, nú þegar við erum að hefja þing aftur: Reynum að vera dálítið samstillt og saman í liði í þessari umræðu því að það er nú yfirleitt þannig að fólk er að reyna að gera sitt besta.
