fjárlög 2026.

Forseti. Ég þakka hv. þm. Guðrúnu Hafsteinsdóttur fyrir hennar ræðu og tek undir með henni að vaxtagjöld ríkissjóðs eru mikið áhyggjuefni. Þetta hef ég ítrekað tekið fram. Nú hafa skuldir ríkisins lækkað, bæði með sölunni á Íslandsbanka sem að öllu leyti var notuð til að lækka skuldir og einnig vegna uppgjörsins á ÍL-sjóði. Þessar háu skuldir eru til komnar vegna hallareksturs ríkisins sem hefur raunar verið rekinn með halla allt frá árinu 2019, allnokkru fyrir þau áföll sem talað hefur verið um hér nokkrum sinnum í þingsal. Þar af leiðandi hefur þessi staða safnast upp. Það er forgangsmál að ná henni niður og við höfum ekki séð síðasta áfallið í sögu Íslands. Það er besta tryggingin fyrir getu ríkissjóðs til að bregðast við slíkum áföllum að skuldastaða ríkisins sé hófleg. Nú liggur fyrir og hefur verið niðurstaða allnokkurra greininga að þær aðgerðir sem gripið var til á Covid-tímanum voru of umfangsmiklar og stóðu of lengi og mig langar til að spyrja hv. þingmann hvort hún deili þessari greiningu. Í því felst engin ásökun heldur einungis að við sameiginlega drögum lærdóm af því sem miður hefur farið.