fjárlög 2026.
Frú forseti. Ég vil þakka hæstv. utanríkisráðherra fyrir ágætisyfirferð, hún var snörp og góð, á þeim verkefnum sem við stöndum frammi fyrir hér í heimsins ólgusjó og falla undir málefni utanríkismála. Mér finnst ágætt að nota tíma minn hér í dag, þann takmarkaða sem ég hef, til að ræða aðeins um varnarmál sem falla einnig undir málaflokk ráðuneytisins, alla vega enn sem komið er. Það sem nú er að gerast í Póllandi, þar sem ógnin frá Rússum hefur alltaf verið skýr og áþreifanleg en aldrei jafn nálægt og akkúrat núna, hefur auðvitað vakið athygli okkar allra og snert okkur öðruvísi en áður. Þetta sjáum við gerast og við erum mjög meðvituð um að Rússar flytja aðgerðir sínar á ógnarhraða til annarra svæða, og þar er íslensk efnahagslögsaga ekki undanskilin; aðgerðir sem felast í íhlutun, skemmdarverkum, netárásum, fjölþáttaógnum og nú drónaárásum sem hægt er að koma með örskömmum hætti frá rússneskri efnahagslögsögu inn í þá íslensku.
Við gegnum lykilhlutverk í svokölluðu GIUK-hliði, grænlenska, íslenska og breska hafsvæðinu sem herstjórn Atlantshafsbandalagsins hefur skilgreint sem eitt helsta forgangssvæði sitt. Ef fælingarmáttur bandalagsins bregst hér þá skerðist öryggi bæði í Evrópu og Norður-Ameríku. Ég vil nota tækifærið og spyrja hæstv. ráðherra: Hvernig ætlum við að tryggja að það fjármagn, sem nú er aukið til öryggis- og varnarmála, verði nýtt á skynsamlegan hátt og forgangsraðað, ef við á, inn á þetta svæði þar sem við verðum þá raunverulega í stakk búin til að bregðast fljótt við þeim áskorunum og ógnum sem eru að verða sífellt áþreifanlegri á þessu svæði? (Forseti hringir.) Og við vitum að við erum hátt skrifuð í hugum þeirra sem við þurfum að hafa miklar áhyggjur af.
