fjárlög 2026.

Frú forseti. Ég vil þakka hæstv. ráðherra fyrir sína yfirferð um þennan mikilvæga málaflokk. Og þar sem hér er ég kominn í fyrsta sinn í pontu eftir sumarið þá vil ég þakka hæstv. ráðherra fyrir hans framkomu hér í þinginu allan síðasta þingvetur, hún var til eftirbreytni og mætti fleiri hæstv. ráðherrar taka hana sér til fyrirmyndar, skoða hana. En hér kom áðan fram í máli hæstv. ráðherra að gervigreind er eitthvað sem er vaxandi. Menn nýta sér gervigreind mismikið, ég held að margir í þessum sal nýti sér hana mikið en grunnurinn að gervigreind og til að nýta sér hana er að þá þarf maður að hafa þekkingu. Þú getur ekki bara slegið inn einhverja setningu og ýtt á takkann og ætlað að nýta þér upplýsingarnar, þú verður að hafa þekkingu. Þar kem ég að því sem spurning mín fjallar um. Í fjárlagafrumvarpinu kemur fram að það er úttekt á námsbrautum til kennslu. Mig langar að fá að vita frá hæstv. ráðherra hvað það er. Hvaða úttekt er þetta? Við lengdum kennaranámið úr þremur í fimm ár og árangurinn af því virðist hafa verið afar takmarkaður samkvæmt alla vega þeirri tölfræði sem við eigum. Að lengja kennaranámið um tvö ár kostar rosalega mikla peninga og mikinn tíma, bæði fyrir ríki og einstaklinga. Það sem mig langar kannski að fá að vita er hvort ráðherrann sé með augun á þessum bolta, að skoða þetta nám. Hvað er það sem hefur farið mögulega úrskeiðis? Hvert er innihald námsins? Hvers vegna skilar það sér ekki út í kennslu í grunnskólunum? Ef við ætlum að nýta okkur gervigreindina sem kemur til með að hjálpa okkur og spara okkur óhemjumikinn tíma þá verðum við að hafa þennan grunn á hreinu og sú menntastofnun sem er að mennta kennarana okkar verður að gera það á skilvirkan og árangursríkan hátt, ef ráðherra getur varpað einhverju ljósi á þetta fyrir mig.