fjárlög 2026.

Virðulegur forseti. Hæstv. ráðherra kom ekkert inn á stórt mál sem hann hefur núna undir sínum hatti í ráðuneytinu sem er 5,3%, félagslegi hlutinn í fiskveiðistjórnarkerfinu, skiptist í strandveiðalínuívilnun, rækju- og skelbætur og síðan byggðakvóta sem er annars vegar almenni byggðakvótinn og hins vegar Byggðastofnunarbyggðakvótinn. Það hafa ýmsar fullyrðingar komið fram. Það kom fram hjá formanni flokks hæstv. ráðherra undir stefnuræðunni að það yrðu 48 dagar í strandveiðum á næsta ári, síendurtekið loforð. Fyrsta spurningin er auðvitað: Hvaðan ætlar ráðherrann að taka þær aflaheimildir sem þarf til að það geti verið hér opnir 48 dagar í strandveiðum á næsta ári? Það verður tekið úr þessum potti af þá línuívilnun, rækju- og skelbótum og byggðakvótanum.

Spurningin er líka hvenær ráðherrann ætlar að opna það og deila því með fólki hvernig hann ætlar að skipta innan þessa fiskveiðiárs því sem á eftir að skipta. Nú hefur eingöngu verið úthlutað til Byggðastofnunarbyggðakvóta. Það eru mjög margar smærri útgerðir sem bíða og afkoma þeirra byggir hreinlega á því að fá byggðakvótaframlög sem eru mjög dreifð víða um landið úr almenna byggðakvótanum. Við vitum af þeim mikilvæga þætti sem rækju- og skelbætur eru, sérstaklega við Breiðafjörð og reyndar við Skjálfanda. Það er alger óvissa hjá þessum útgerðum í dag. Sumir komast hreinlega ekki á sjó og afleiðingar breytinga á veiðigjaldi hér frá síðasta sumri og svo þetta til viðbótar eru að leiða til þess að mjög víða, ég er búinn að heyra þrjú eða fjögur dæmi um litlar útgerðir sem þegar eru búnar að selja sig; tvær á Snæfellsnesi, ein í Grindavík og ein fyrir austan. Þetta eru útgerðir sem eru kannski með svona (Forseti hringir.) um 100 þorskígildistonn og hafa síðan byggt afkomu sína á því að geta verið með línuívilnun, geta jafnvel verið með hlutdeild í byggðakvóta og síðan nýtt strandveiðarnar (Forseti hringir.) þann tíma sem þær hafa verið og eru jafnvel með einhverjar grásleppuveiðar. Þessi fyrirtæki eru horfin í hendur á stærri fyrirtækjum.