fjárlög 2026.

Virðulegi forseti. Ég þakka hæstv. dómsmálaráðherra fyrir framsögu sína. Þó að þingmenn séu oft og tíðum ósammála um umfang ríkisvaldsins þá hygg ég að við séum flest sammála um það að frumhlutverk þess er að halda uppi lögum og reglu, þannig að málaflokkur dómsmálaráðherra lýtur að kjarnastarfsemi ríkisins.

Í fjárlagafrumvarpinu kennir ýmissa grasa og það má finna þar nokkur góð mál, til að mynda fjölgun lögreglumanna og byggingu nýs fangelsis að Stóra-Hrauni en það er ráðgert að verja 1.300 millj. kr. í uppbyggingu þess á næsta ári. Ég vil spyrja ráðherrann um heildarkostnað framkvæmdanna, hver er áætlaður heildarkostnaður framkvæmdanna? Tilefni fyrirspurnarinnar er upplýsingagjöf frá ráðuneytinu því að í maí á þessu ári var kostnaðurinn sagður 17,8 milljarðar en í samþykktri fjármálaáætlun frá júlí 2025 er hann sagður 14,6 milljarðar. Þetta er fyrsta spurningin. En ég vil halda áfram að fjalla um fangelsismálin. Þetta er stór málaflokkur. Það stendur til að verja 6,3 milljörðum í málaflokkinn á næsta ári en kostnaður samfélagsins af brotastarfsemi er hins vegar margfeldi af þeirri fjárhæð. Í klassískum skilningi hafa fangelsisrefsingar verið taldar þjóna þremur markmiðum og þau eru réttlæti, varnaðaráhrif og betrun. Ég vil einmitt spyrja dómsmálaráðherra út í síðasta þáttinn, betrunarþáttinn, vegna þess að ég hygg að besta leiðin til þess að draga úr kostnaði í málaflokknum sé að koma í veg fyrir endurkomur en það getur vart talist ásættanlegt að helmingur dómþola snúi aftur í fangelsi fyrir endurtekin afbrot.