fjárlög 2026.

Virðulegi forseti. Ég vil þakka hv. þingmanni fyrir hans framlag. Það er rétt sem fram kom að að óbreyttu stefnir í, miðað við 41% samdráttarmarkmið til ársins 2030 sem Ísland fær úthlutað af hálfu Evrópusambandsins í Evrópusamvinnunni, að Ísland geti þurft að kaupa a.m.k. losunarheimildir fyrir 11 milljarða vegna tímabilsins 2021–2030. Ef við náum meiri árangri í þessum málaflokki getum við saxað á þessa tölu. Það er líka rétt sem kom fram hjá hv. þingmanni, og mér heyrist þá hafa verið rætt hér í þingsal í gær, að umtalsverðum fjármunum er varið í loftslagstengd verkefni á hverju ári, miklu meira en 11 milljörðum. En við þurfum að hafa í huga að þar er verið að tína til ýmislegt og margt af því sem þar er verið að tína til hefur ávinning og tilgang langt umfram það að draga úr losun gróðurhúsalofttegunda. Hér t.d. vorum við hv. þm. Ólafur Adolfsson að ræða um mikilvægi verðmætasköpunar. Mikið af þessum fjármunum fer beinlínis í fjárfestingar sem eru til þess fallnar að styðja við samkeppnishæfni Íslands, framleiðni og verðmætasköpun til lengri tíma þannig að ég held að það væri óráðlegt að fara að draga eitthvað rækilega úr þessum útgjöldum. En við verðum alltaf að halda vöku okkar og vera tilbúin að fara betur með fé og það er nú nákvæmlega það sem ég hef verið að gera. Þess vegna erum við t.d. að setja á fót fagráð hjá Loftslags- og orkusjóði af því að þetta er orðinn milljarðasjóður og þá er eðlilegt að farið sé faglega yfir allar umsóknir og það verði ekki áhyggjur af því að það sé verið að úthluta samkvæmt einhverju öðru en faglegum sjónarmiðum. Þetta skiptir máli líka upp á trúverðugleikann þegar kemur að loftslagsaðgerðum. Ég hlakka til samstarfsins við þingið um þessi mál.