fjárlög 2026.
Frú forseti. Ég þakka hæstv. ráðherra fyrir fína yfirferð hérna áðan yfir sína málaflokka. Á þeim litla tíma sem ég hef langar mig að spyrja ráðherrann út í áætlanir um orkuöflun og leyfisveitingar. Ég sá náttúrlega eins og aðrir að ráðherra var að kynna aðgerðir og áherslur í loftslagsmálum og við verðum bara að taka þá umræðu seinna, hún krefst sennilega mikillar yfirlegu. En við skulum ekki gleyma því að 85% íslenskra orkugjafa eru hrein orka, jarðvarmi 65% og vatnsafl 20%. Ísland er ljósárum á undan Evrópusambandinu sem stendur í innan við 25% hreinni orku, að mig minnir. Það er því alveg ótrúlegt og fáránlegt að stjórnmálaflokkum hafi yfirhöfuð dottið í hug til að mynda að innleiða orkupakka ESB, hafandi nákvæmlega ekkert við þá að gera. Við vitum að í dag eru fjölmargir góðir orkukostir í nýtingarflokki rammaáætlunar, bæði í jarðvarma og vatnsafli. Við vitum líka að verkfærið sem rammaáætlunin átti að vera til sátta hefur ekki virkað sem skyldi og hefur Miðflokkurinn t.d. lagt til að fara, á meðan svo er, þá leið að virkjunarkostum verði komið til framkvæmda með sérlögum um hvern og einn þeirra. Við þekkjum vandræðin sem Hvammsvirkjun lenti í og ég veit að hæstv. ráðherra hefur oft verið spurður hvort það hefði ekki verið betra að setja sérlög um þá virkjun. Hann hefur svarað því neitandi en vegna vandræðanna sem virkjunin hefur lent í þá langar mig að spyrja hann aftur hvort hann hafi skipt um skoðun. Hefði ekki verið betra að setja sérlög um þá virkjun og mun ráðherra skoða að setja sérlög um aðra orkukosti sem eru í nýtingarflokki í rammaáætlun?
Svo er annað varðandi boðað frumvarp um breytingar á ýmsum lögum um einföldun leyfisferla á sviði umhverfis- og orkumála. Þá langaði mig að spyrja ráðherrann hvort hann geti staðfest hér og nú að ekki standi til að slá af kröfum (Forseti hringir.) sem uppfylla þarf í ferlinu vegna þess að ég veit að það eru áhyggjur ýmissa af slíku.
