afmörkun á uppbyggingu vindorkuvera.

Virðulegi forseti. Ég þakka hv. þingmanni fyrir frábærar spurningar sem eru grundvallarspurningar. Af hverju ég er að leggja fram þessa þingsályktun? Akkúrat til að ræða þessi atriði. Hv. þingmaður segir: Þetta er ferli, þetta er ekki stjórnlaust. Það hlýtur þó að vera eitthvað að ferlinu ef þú þarft ekki einu sinni leyfi landeiganda til að leggja til vindorkugarð á hans eigin landi. Það er staðan í dag og þess vegna er hægt að keyra áfram með óeðlilegum hætti. Eins og ég sagði áðan er vindorkan óstaðbundin sem gerir myndina miklu flóknari en í öðrum orkugjöfum.

Varðandi eignarhaldið ætla ég að segja við hv. þingmann að ég tel að það hafi vantað umræðu um þessa grundvallarstefnubreytingu — því að eins og hann sagði hefur eignarhaldið á Landsvirkjun verið í mjög þverpólitískri sátt — þ.e. þessa umræðu sem ég er m.a. að kalla eftir með þessari þingsályktunartillögu; umræðu um það hvort almenningur í landinu, fólkið í landinu, vilji að við gerum breytingu í átt að fjölbreyttara eignarhaldi auðlinda. Það sem ég get alveg sagt að sé grundvöllur, ef það á að vera fjölbreyttara eignarhald í vindorku, sem ég set spurningarmerki við, ég tel alla vega að við eigum að byrja á þessum tveimur verkefnum sem er búið að leyfa í rammaáætlun, þá þarf eðli málsins samkvæmt að tryggja að ábatinn skili sér til þjóðarinnar. Því að alveg eins og hv. þingmaður kom inn á mun ábatinn ekki skila sér í gegnum hlutabréfseignina í fyrirtækinu sjálfu. Þá þarf að hugsa það upp á nýtt.