óverðtryggð húsnæðislán.

Virðulegur forseti. Ég heyri að hæstv. ráðherra hefur ekkert kynnt sér þessa vinnu frekar, en þetta eru fyrstu viðbrögð hans frá í fyrra og þau eru misskilningur. Þessi vinna var sett af stað í fjórum áföngum. Fyrsta skýrslan var að kanna hvert fyrirkomulagið er í öðrum löndum, hvert vaxtastigið er í öðrum löndum, hver húsnæðiskostnaðurinn er í öðrum löndum. Í ljós kemur að t.d. innan evrusvæðisins er vaxtakostnaðinum ekki stýrt af stýrivöxtum seðlabankans heldur einmitt stöðu ríkisins í hverju landi og er á bilinu frá 1,5% upp í 8% eða 10% eftir atvikum á hverjum tíma. Húsnæðiskostnaður í Danmörku og Finnlandi var t.d. þriðjungi hærri en á Íslandi árið 2023 að mati Eurostat. Þarna eru lagðar fram raunverulegar hugmyndir, fyrsta skref. Hugmyndin var að fara síðan í næsta skref og kanna ítarlegar. Það sem hæstv. fjármálaráðherra og ríkisstjórnin ætla að segja er: Nei, við ætlum ekki að skoða þessa leið sem öll önnur lönd í heiminum í kringum okkur fara, hvernig við getum tekið út verðtryggingu. Við ætlum ekki að taka næsta skref. Þriðja skrefið, ef skref númer tvö hefði verið jákvætt, var síðan nánara samtal við bankana, (Forseti hringir.) við lífeyrissjóðina, við alla aðra. Fjórða skrefið var síðan framkvæmdin. Það tekur tíma en ríkisstjórnin segir: Nei, við ætlum ekki að skoða leiðir (Forseti hringir.) til að draga úr vægi verðtryggingar og við ætlum bara að vera áfram í þessu basli sem við erum í.