tilraunaverkefni um lokun vegkafla sem áformað er að setja undir borgarlínu.
Virðulegi forseti. Ég þakka hv. þm. Bergþóri Ólasyni fyrir að vekja athygli á umferðartöfum á höfuðborgarsvæðinu. Ég tek hjartanlega undir áhyggjur hans varðandi vaxandi umferðartöf á næstu árum sem öll spálíkön sýna að er gríðarleg. Spálíkön, sem sveitarfélögin og ríkið hafa unnið í sameiningu, sýna fram á það að ef við förum ekki í að breyta ferðavenjum á höfuðborgarsvæðinu muni umferðarferðartími aukast um 80% og umferðartafir um 65%. Þetta er það sem blasir við árið 2040 ef við gerum ekkert. Það er gott að við séum með umferðarlíkön, það er hægt að keyra spálíkön og sjá hvernig umferð þróast án þess að þurfa að leggja keilur og raunverulega framkvæma slíkar tilraunir.
Ef við treystum ekki þessum líkönum og myndum vilja framkvæma raunveruleikatilraun, eins og Miðflokkurinn er að leggja til, þá þyrftum við nefnilega að gera tvennt: Við þyrftum annars vegar að byrja á því að loka umferðinni til að ná fram 80% aukningu í umferðartöfum, sem sýnir fram á hvað gerist ef við gerum ekkert, (Gripið fram í.) og svo hins vegar væri hægt að loka einni akrein sem borgarlínan er og sjá hve munurinn er. Það góða við þetta er að við getum gert þetta í tölvum og það er búið að gera í tölvum. Umferðartafirnar verða meiri ef við förum ekki í borgarlínuverkefnið. Þær verða meiri. Það er það erfiða. Okkur fjölgar um 160 manns á höfuðborgarsvæðinu í hverri viku og með óbreyttum ferðavenjum, ef við bætum ekki almenningssamgöngur, þá munu umferðartafir aukast, það verða meiri umferðartafir en ef við förum í borgarlínuverkefnið. Ég lít ekki svo á að við séum að ræða hér afstöðu okkar til borgarlínunnar heldur afstöðu okkar til þessarar þingsályktunartillögu.
Ég vil spyrja: Treystir hv. þingmaður ekki umferðarlíkönunum sem sýna þetta alveg svart á hvítu? Ef hann vill fara í þessa tilraun, myndi hann þá vilja fara í báðar tilraunir; ná fram 80% töfunum eins og gerist ef við förum ekki í borgarlínu samhliða því að loka bara borgarlínuakreinum?
