aðgerðir vegna skipulagðrar brotastarfsemi á Íslandi.

Virðulegi forseti. Það er dökk mynd sem birtist okkur í skýrslu greiningardeildar ríkislögreglustjóra um skipulagða brotastarfsemi á Íslandi. Skipulagðir brotahópar hafa fest sig í sessi og stigmögnun og sýnileiki hefur aukist. Það er meira ofbeldi og alvarlegra, brotin eru umfangsmeiri og erlendir brotahópar sitja um landið sem aldrei fyrr. Í okkar litla samfélagi starfa í kringum 20 skipulagðir brotahópar sem hafa flestir erlendar tengingar. Sérstaklega er fjallað um veikleika sem laða að sér skipulagða brotastarfsemi, m.a. í eftirliti eða lagalegri umgjörð. Sömuleiðis er bent á það sem við auðvitað vitum, að umhverfið hér færist sífellt nær því sem gerist í nágrannalöndunum þar sem ofbeldisalda hefur gengið yfir vegna glæpagengja og skotbardagar og sprengjuárásir eru daglegt brauð. Við höfum auðvitað stigið mikilvæg skref á undanförnum árum til að styrkja varnir okkar gagnvart þessum glæpum, komið á fót og styrkt samfélagslöggæslu og við komum í gegn mikilvægum breytingum á lögreglulögum, þótt einhverjir þingmenn hafi verið mótfallnir þeim, og sömuleiðis á vopnalögum. Við höfum séð nýleg dæmi um löggæslu gagnvart hættulegum erlendum glæpahópum þar sem þessar breytingar skiptu sköpum. Hæstv. dómsmálaráðherra hefur verið mjög ákveðin í sínum málflutningi enda reynslumikil á þessu sviði. Mig langar því að spyrja hana að því hvað við getum gert betur og hver séu næstu skref. Við hljótum að líta til nágrannalandanna. Ég hef tekið þessi mál upp reglulega hér í þinginu, m.a. varðandi fleiri og/eða þyngri refsingar við skipulagðri brotastarfsemi, en Danir og Svíar hafa hert á refsingum fyrir gengjaglæpi, og sömuleiðis útvíkkun refsiramma. Mig langar sérstaklega að nefna refsingar varðandi tilraunir til að narra ungmenni til liðs við skipulagða glæpastarfsemi.