leyfi til veiða á álft, grágæs, heiðagæs og helsingja utan hefðbundins veiðitíma.

Frú forseti. Er nauðsynlegt að skjóta þá? spurði Bubbi Morthens fyrir nokkru síðan í öðru samhengi. Ég held að svarið við þeirri spurningu í þessu samhengi sé já. Við horfum hér á mikið tjón sem verður á ökrum bænda landið um kring árlega og þegar við skoðum þá miklu stækkun þeirra stofna sem hér eru undir, sérstaklega álftastofninn sem hefur rétt um tífaldast frá 1960, þá fer því fjarri að hér sé verið að fjalla um fugla sem eru í einhvers lags hættu. Álftin hafði verið friðuð í þrjú ár þegar Framsóknarflokkurinn var stofnaður og er kannski orðin dálítið værukær þess vegna hvað umhverfi sitt varðar hverju sinni. En ég held að jafnvel þó að veiðar á álft verði leyfðar þá verði það nú varla svanasöngur stofnsins. Ég ætla að leyfa mér að skamma framsögumann málsins örlítið fyrir að hafa ekki sent mér fleiri tölvupósta hvað það varðar að fá að vera meðflutningsmaður á þessu máli, þetta er prýðisgott mál. Ég held að við eigum hér í þinginu að taka höndum saman og tryggja að þetta komist í gegn til lokaafgreiðslu hér því að tjónið sem ágangur þeirra tegunda sem hér eru tilgreindar veldur er umtalsvert og áþreifanlegt fyrir bændur landsins.

Hér er vísað til sambærilegra aðgerða og gripið hefur verið til í öðrum löndum, sérstaklega í Skotlandi sýndist mér. Mig langar að spyrja hv. þingmann: Hvernig hefur það gengið? Hefur hv. þingmaður einhverjar upplýsingar um það hvernig hafi tekist til við að annaðhvort minnka þá stofna sem þar um ræðir, eða lagt var til atlögu við að minnka, og hvernig hafi unnist úr þeirri nálgun þar sem hún hefur verið viðhöfð á fyrri stigum?