endurgreiðslur vegna kvikmyndagerðar á Íslandi.
Virðulegur forseti. Í beinu framhaldi af því sem hv. þm. Jón Gnarr var að koma inn á, um að auka veg sjónvarpsins, get ég tekið undir það. Ég get líka tekið undir að það er áhugavert og ánægjulegt að fylgjast með sjónvarpsþáttum sem hv. þingmaður leikur eitt aðalhlutverkið í, er reyndar töluvert mikið eldri í þeim sjónvarpsþáttum en hann lítur út fyrir að vera svona dagsdaglega og leikur alveg afspyrnuleiðinlegan mann að mínu viti. En ég viðurkenni að það bærast með manni alls konar tilfinningar þegar maður horfir á svona listsköpun og maður er jafnvel farinn að vorkenna þessum gamla karli sem virðist eiga erfitt uppdráttar í lífinu. En að þessu máli hér þá styð ég og hef stutt endurgreiðslur vegna kvikmyndagerðar á Íslandi. Ég nota orðið endurgreiðsla eins og er í lögunum vegna þess að ég leit alltaf þannig á að við værum í raun að endurgreiða virðisaukaskatt; ef þú ert að framleiða vöru til útflutnings færðu virðisaukaskattinn af öllum aðföngum sem keypt eru endurgreiddan en þú selur vöruna erlendis án virðisaukaskatts. Ég leit alltaf þannig á að þarna værum við bara að finna leiðir til að bregðast við, að afþreyingariðnaðurinn í þessu tilfelli, sem er að framleiða eitthvað sem er óáþreifanlegt, njóti í raun sömu kjara og aðrar framleiðslueiningar í formi vöru. Ég verð að viðurkenna að það eyðilagði smá fyrir mér þessa röksemdafærslu þegar við hækkuðum endurgreiðsluna upp í 35%, hún er þá meiri en virðisaukaskatturinn sem slíkur. Engu að síður studdi ég það heils hugar vegna þess að ég hef tröllatrú á skapandi greinum heilt yfir. Ég held að það sé nú það sem við getum virkjað endalaust, skapandi hugsun og skapandi greinar og ég sé mjög marga kosti við það að okkur hefur tekist að byggja upp alveg ofboðslega öflugan iðnað. Það eru ekkert ofboðslega mörg ár síðan að þeir sem störfuðu við kvikmyndagerð á Íslandi þurftu að gera það í hjáverkum og hlutastörfum, það var einfaldlega ekki í boði að vera í fullri vinnu við það. En það hefur töluvert mikið breyst á síðustu árum og ég tek undir með þeim sem það hafa sagt því að nú erum við bara komin með kvikmyndagerð á Íslandi í fremstu röð. Ég hygg að hið opinbera hafi lagt mikið af mörkum þar með því að búa til þetta starfsumhverfi sem hefur falist í þessu frumvarpi eða í þessum lögum. Ég styð þar af leiðandi algerlega framlengingu á þessum lögum. Ég er aðeins að átta mig á því hver breytingin er en ég tek undir það sem stendur í 3. gr. varðandi áherslur fyrir börn og ungmenni. Ég held að það sé góð áhersla og til bóta og ég tek undir það sem hér hefur verið sagt að okkur ber að huga sérstaklega að kvikmynda- og sjónvarpsefni fyrir börn og ungmenni því þar er líka samkeppnin svo ofboðslega mikil og það er auðvitað grunnurinn að tungumálinu okkar að boðið sé upp á afþreyingarefni á okkar tungumáli, á íslensku. Þarna er auðvitað gígantísk samkeppni við alls konar miðla, hvort sem það eru tölvuleikir, samfélagsmiðlar eða erlent sjónvarpsefni, þannig að ég styð það að við gerum allt sem í okkar valdi stendur til að styrkja framleiðslu á efni sérstaklega fyrir börn og unglinga.
Virðulegur forseti. Sú sem hér stendur hefur setið á þingi frá hausti 2016 sem óbreyttur þingmaður. Það þýðir að maður hefur ekki náð málum í gegnum þingið, það er sjaldgæft að ná því. En það rifjaðist upp fyrir mér að sú sem hér stendur hefur einu sinni tekist að ná máli í gegnum þingið og það var breyting á þessum lögum. Það var einmitt 2. gr. laganna varðandi endurgreiðslurnar þar sem sérstaklega var bætt við að það ætti líka við ef hluti af framleiðslukostnaðinum félli til í Grænlandi eða Færeyjum. Ég flutti það frumvarp í samstarfi við Íslandsdeild Vestnorræna ráðsins því að eins og flestir vita þá eru Grænland og Færeyjar ekki í EES en við höfum það inni í okkar reglum að hluti af kostnaðinum, ég held að það sé 20% eða slíkt, má verða til utan landsteinanna. Við endurgreiðum þetta sem sagt ef 80% eða meira fellur til á Íslandi og eðli málsins samkvæmt er það oft þannig í kvikmyndagerð að það er verið að fara á milli staða. Ég er mjög stolt af því að okkur hafi tekist að fá þessu breytt. Ég átta mig reyndar ekki alveg á því hversu miklu máli þetta hefur skipt. Ég mun kannski beina fyrirspurn til hæstv. ráðherra því að ég held að það væri áhugavert að fá niðurstöðu úr því. En fyrir fram myndi ég halda að það væri eitthvað, alla vega höfum við séð samstarf á milli þessara þjóða þegar kemur að upptökum. Við vitum að landslagið hér er oft svolítið líkt og í Færeyjum og Grænland hefur auðvitað alveg einstaklega fallega, ögrandi og öðruvísi náttúru sem margir myndu kannski halda að væri íslensk en er sérgrænlensk. Við sjáum alla vega sjónvarpsefni sem hefur verið framleitt á Íslandi og Grænlandi og eflaust í Færeyjum líka. Mig langaði því bara að geta þessa hér.
Annars vona ég að við náum þessu máli hér í gegnum þingið því að ég held að um mikilvægt mál sé að ræða og hvet hæstv. ráðherra áfram í því að styðja skapandi greinar.
