almennar skattahækkanir og álagning refsiskatta.

Frú forseti. Nú þegar ríkisstjórnin er orðin u.þ.b. ársgömul hefur komið í ljós að hún ætlar sér ekki að því er virðist, a.m.k. ekki á sínu fyrsta ári, að standa við neitt af stóru loforðunum sem gefin voru fyrir kosningar. Hæstv. forsætisráðherra lofaði því að skattar yrðu ekki hækkaðir á almenning. Nú horfum við upp á röð skattahækkana og meira í vændum.

Hæstv. forsætisráðherra ætlaði líka að spara í rekstri ríkisins og ná þannig tökum á verðbólgu og vöxtum. Engu að síður var kynnt fjárlagafrumvarp sem gerði ráð fyrir meiri ríkisútgjöldum en nokkurt annað slíkt frumvarp, áframhaldandi hallarekstri ríkisins, hallarekstri sem mun bara aukast eftir þau áföll sem dunið hafa á, nú á hinu svokallaða verðmætasköpunarhausti. Meira að segja félagar hæstv. forsætisráðherra í ríkisstjórn, ungliðar í Viðreisn, skammast í Samfylkingunni fyrir skattasýki flokksins og tala um skattfylkinguna. Þetta eru flokksfélagar hæstv. fjármálaráðherra sem tala svona um Samfylkinguna.

Spurning mín er þessi, frú forseti: Hvenær hætti hæstv. forsætisráðherra við að reyna að standa við kosningaloforðin? Og einnig: Má vænta einhverra viðbragða við þeim aðgerðum Evrópusambandsins sem hv. þm. Guðrún Hafsteinsdóttir spurði um hérna áðan? Væri ekki ráð að byrja á því að falla frá áformum um álagningu refsiskatta á flugsamgöngur og vöruflutninga með skipum? Enda óþarft með öllu og eingöngu gert til að gleðja Evrópusambandið á sínum tíma (Forseti hringir.) en nú þurfum við væntanlega ekki að leggja okkur fram við það að gefa Evrópusambandinu enn þá meira fjármagn með enn þá meiri skattlagningu íslensks almennings.