almannavarnir.

Frú forseti. Ég vil þakka hv. þingmanni fyrir hans ræðu og hans yfirferð sem var bara mjög góð og ítarleg. Ég tek undir orð hans um að þetta verði gott og skemmtilegt verkefni að vinna í allsherjar- og menntamálanefnd. Af því að nú veit ég að þingmaðurinn er löglærður þá langar mig kannski aðeins að spyrja hann út í þessar vangaveltur sem hann hefur verið með hér í andsvari við ráðherra og núna varðandi þetta mat sem stendur til að gera vegna varnaraðgerða í tengslum við Svartsengi. Það vill nú þannig til, eins og hér vita flestir, að ég þekki þetta mál kannski ágætlega, og reyndar mjög vel. Þá velti ég því fyrir mér að hluti af þessum aðgerðum sneru að beinum eignum þessara aðila. Ég get nefnt sem dæmi kílómetra af Njarðvíkurleiðinni, ég get nefnt einhver möstur og lagnir Landsnets, raflagnir í eigu HS veitna og fleiri aðila og að þær viðgerðir sem þurfti að fara í voru greiddar úr ríkissjóði. Þessar eignir eru núna í rekstri þessara aðila og tekjur skapast af þeim í þeirra rekstri. Ég er að velta fyrir mér hvort það breyti einhverju í þessum vangaveltum hv. þingmanns varðandi þá hugsanlegu — ég ætla ekki að nota orðið skaðabótaskylda heldur kannski endurgreiðslukröfu ríkisins á þessa aðila — hvort það myndi teljast eðlilegt í ljósi laga að aðili sem hefur fengið afhenta vöru, greidda af ríkinu en nýtir hana til að afla tekna, að það skapist einhver krafa á viðkomandi að greiða ríkinu til baka þann kostnað sem þarna féll til. Þarna á ég við bara beina innviði sem ríkið greiddi fyrir en þessir aðilar nýta í dag.