almannavarnir.

Frú forseti. Ég vil þakka hv. þingmanni fyrir hans góða andsvar og langar í síðara andsvari að fara aðeins í aðeins önnur mál sem hann nefndi í máli sínu og dýpka kannski aðeins þessar vangaveltur. Hv. þingmaður nefndi valdheimildir á hættustundu og það sem er tekið fram þar. Ég tek fyllilega undir með hv. þingmanni að auðvitað þarf að gæta meðalhófs en líka lögmætis þannig að á bak við þessar ákvarðanir liggi mjög skýrar greiningar og að þetta sé allt saman skjalfest og gert rétt. Þá komum við einmitt að því sem hv. þingmaður nefndi varðandi rýnina, bæði innri og ytri rýni. Aftur, þá þekki ég þessi mál ágætlega, hvernig þetta hefur verið frá 2022. Ef við skoðum þessi rýnismál þá hafa verið haldnir fjölmargir rýnifundir vegna umbrotanna á Reykjanesi. Síðan er þessi starfshópur sem skipaður var af dómsmálaráðherra fyrir ári eða meira en ári síðan, hann var skipaður og er ekki búinn að skila sinni skýrslu. En fyrir liggja hins vegar fjölmargar rýniskýrslur sem hefur verið skipt upp og búið til verkefni úr þeim.

Það sem mig langaði að velta fyrir mér í seinna andsvarinu var varðandi fjölmiðlana sem við höfum rætt hérna örlítið. Ég held að þetta orðalag sem kemur þarna í frumvarpinu sé úr samkomulagi sem var gert milli dómsmálaráðuneytisins og að ég held með aðkomu lögreglustjórans á Suðurnesjum á sínum tíma eftir árekstur sem varð þar og að þetta orðalag komi þaðan. En ég hef einmitt velt fyrir mér af því við erum að horfa á bæði valdheimildirnar og fjölmiðlana og aðganginn hér: Þyrftum við ekki aðeins að skoða lögreglulögin og heimildir lögreglustjórans sem þar eru í sambærilegu samhengi? Það eru ekki bara þær valdheimildir sem við erum með hér sem þeir geta nýtt sér heldur líka þær valdheimildir sem eru í lögreglulögunum. Stundum er óljóst þarna á milli hvort þeir eru að beita þeim valdheimildum eða valdheimildum í almannavarnalögunum.