fjáraukalög IV 2025.
Virðulegur forseti. Ég þakka hæstv. fjármála- og efnahagsráðherra fyrir innganginn. Ég held að við flest sem hér erum inni séum orðin þokkalega södd eftir daginn og ætla ég því ekki að hafa þessa yfirferð mína langa en langaði aðeins að koma inn í umræðuna við 1. umræðu og segja að ég hlakka til að fá þetta frumvarp inn í fjárlaganefnd, ræða það þar og fá skýringar.
Ég átta mig á og verð að viðurkenna að sú hækkun sem hér er talin upp, þessir tæplega 98 milljarðar frá fjárlögunum, er meiri en ég hafði reiknað með, þó að ég átti mig á að lífeyrisskuldbindingarnar eru þar langstærstar, 43 milljarðar, og vaxtagjöldin. En eftir standa 30 milljarðar sem er síðan útskýrt í frumvarpinu hvernig falla til. Ég skal viðurkenna það, virðulegur forseti, að ég er ekki búinn að lesa þetta frumvarp frá A til Ö. Ég er svo sem ekki eini maðurinn sem hefur ekki lesið heima en ég velti fyrir mér — ég man það bara ekki og mun spyrja betur út í það í fjárlaganefndinni — varðandi tekjuhlutann, tekjurnar, að það er ekkert um tekjurnar í þessu frumvarpi eða alla vega fann ég það ekki, virðulegur forseti, breytingarnar á tekjunum á móti gjaldahækkuninni. Ég hef svo sem ekki stórar áhyggjur af því í 1. umræðu, ég fæ væntanlega svör frá ráðuneytinu á því öllu saman. Auðvitað er hægt að reikna þetta út miðað við heildarniðurstöðutöluna og komast að því hver hækkunin sé á tekjum. Það vekur líka athygli mína að heildarniðurstaða ársins er áætluð 38 milljarðar í mínus, var í fjárlögunum fyrir árið 2025 62,6 milljarðar í mínus. Ef ég man rétt, og var ég að kíkja á þessa tölu í umræðunni áðan, þá minnir mig að hún hafi verið komin niður í 15 milljarða í fjárlagafrumvarpinu fyrir árið 2026. Það verður líka fróðlegt að fá skýringar á því hvað hefur gerst í millitíðinni frá því að frumvarpið er lagt fram með 15 milljarða halla sem fara upp í 38 milljarða, sem er þó miklu betri niðurstaða en að við gerðum ráð fyrir í fjárlögunum með þessum 62,6 milljörðum. Ég hlakka bara til að takast á við þetta og fá betri svör í fjárlaganefnd varðandi þetta frumvarp. Ég held að ég ætli svo sem ekkert að fara hér ofan í málefnasviðin. Þó að það sé örugglega alveg tilefni til þess að rýna í þau hér þá held ég að betra sé að við gerum það í nefndinni og getum þá átt dýpri umræðu um það og upplýstari við 2. umræðu. Ég læt þetta því gott heita að svo stöddu, virðulegi forseti.
