húsnæðismál.

Frú forseti. Ég þakka hv. þingmanni fyrir síðara andsvar. Ég ætla nú að byrja á niðurlagi fyrirspurnarinnar, hvernig stendur á því að stærri hlutinn eru barnlausir einstaklingar sem fá hlutdeildarlánin og kaupa sér íbúðir. Ég held að ef við horfum á markaðinn okkar hér liggi það í hlutarins eðli að þú færð ekki stóra íbúð eða neina íbúð sem hentar kannski fjögurra til sex manna fjölskyldu, engan veginn. Við erum að hækka t.d. núna hámarksverð á íbúðum sem er núna að fara úr því að vera um 78 milljónir í 87 millj. kr. Það hefur verið mjög þröngur stakkur sniðinn um húsnæði. Fyrstu kaupendur, eins og við erum að tala um, eru eðli málsins samkvæmt oft, ef það er yngra fólk, einstaklingar sem eru búnir að búa heima og er verið að reyna að aðstoða í fyrstu kaupum og fái ódýrari íbúðir. Þar sem íbúðaverð hefur verið svona gífurlega hátt þá hefur þetta því miður ekki kannski nýst stærri og barnmörgum fjölskyldum. Ég hugsa að það sé nú ein ástæðan.

Aftur með þetta tímamark, að gildistíminn eigi að vera og er 1. janúar. Við munum þá bara — það hefur verið regluleg úthlutun. Það er til fjármagn, það er reglulega verið að úthluta hlutdeildarlánum núna eftir mjög svo, hvað á ég að segja, gloppóttar úthlutanir fyrr á árinu og á fyrri árum. Ég held að ég geti fullyrt að frá því í ágúst, frekar en fyrr á árinu jafnvel, þá hefur alveg verið sótt um í hlutdeildarlánasjóðnum okkar og úthlutað mánaðarlega úr honum. Við munum halda áfram óháð því hvort okkur tekst að vinna málið faglega. En við vorum að bíða líka eftir því að sjá hvað kæmi út úr þessum vaxtadómum og öllu því sem er að gerast þannig að við getum líka litið til þess (Forseti hringir.) hvernig við gætum hækkað og lyft upp þessu greiðsluhlutfalli sem Seðlabankinn hefur verið að einblína á. Þetta er stórt og þetta er mjög umfangsmikið. (Forseti hringir.) Þess vegna höfum við ekki getað komið hlaupandi með þetta inn af því að þá hefði ég ekki haft það að segja sem segir í frumvarpinu núna.