Skýrsla starfshóps um þróun í útgáfu dvalarleyfa og misræmi við önnur Norðurlönd.
Virðulegur forseti. Ég þakka hæstv. dómsmálaráðherra fyrir skýrsluna sem kom út í nóvember. Ég held að hún gæti kannski verið fyrsta skref, innlegg inn í frekari umræðu um þessi mál og a.m.k. frekari greiningu á stöðu þessara mála allra. Mér finnst í þessari skýrslu kannski svolítið skorta á að það sé líka gerð ítarleg grein fyrir þróun fólksfjölgunar á grundvelli EES-samningsins. Hæstv. ráðherra nefndi það hér í upphafi umræðunnar að stærstur hluti þeirra sem hingað koma er vegna EES-samningsins og hafa verið. Það liggja svo sem fyrir tölur um að fjölgun á Íslandi í kjölfar EES-samningsins hefur verið í takt við hagsveiflu á Íslandi á hverjum tíma. Þetta er svo sem mjög auðvelt að sjá með tölunum.
Hitt er annað mál, og ég tek undir það með hæstv. dómsmálaráðherra, að þessi mikla fjölgun sem hefur verið hér er auðvitað ekki sjálfbær. Innviðir okkar, heilbrigðisþjónustan kannski einkum og sér í lagi og félagsleg þjónusta, standa ekki undir þessari fjölgun sem hefur verið og þá er brýnt að menn átti sig á því að hve miklu leyti sú ósjálfbærni stafar frá EES-samningnum, þeirri fjölgun, eða frá einhverjum öðrum þáttum. Þótt ég taki undir það með hæstv. dómsmálaráðherra að EES-samningurinn hafi heilt yfir verið til hagsbóta fyrir okkur, og verður það vonandi áfram þótt reynt sé að brjóta hann af hálfu stóra samningsaðilans í því og brjóta gegn okkur, þá finnst mér það einnar messu virði að íslensk stjórnvöld skoði hvort tímabært sé að óska eftir einhvers konar endurskoðun á EES-samningnum í ljósi hins vegar heimildar EES-samningsins til að takmarka frjálsa för vinnuafls á milli landa við ýmsar aðstæður, (Forseti hringir.) af því að sú heimild er fyrir hendi í EES-samningnum þegar ákveðnar aðstæður koma upp í löndunum.
