Skýrsla starfshóps um þróun í útgáfu dvalarleyfa og misræmi við önnur Norðurlönd.

Virðulegur forseti. Ég þakka öllum viðstöddum hv. þingmönnum fyrir ágætar umræður í dag. Það er að mörgu leyti upplýsandi að hér sé ákveðið samkomulag um að við séum komin að vissum þolmörkum í fólksfjölgun út frá innflytjendum. Ég er ánægður með að slíkur sameiginlegur tónn heyrist. Margt sem hefur verið sagt er misviturlegt, að mínu mati, eins og einhverjar hugmyndir um að íslensk tunga hafi ekki verið til umræðu hér almennilega. Ég hef nú tekið hana sérstaklega til umræðu í allri minni pólitík en bendi hins vegar mönnum á að það er ekki raunhæft að flytja hér inn endalaust af fólki og segja svo að við ætlum að dæla auka 100 milljónum í íslenskukennslu. Á einhverjum tímapunkti hverfa hvatarnir fyrir því að menn tali íslenska tungu hérna. Það er mikilvægt að átta sig á því.

Forsenda velmegunar, er sagt um EES-samninginn. Jú, það má væntanlega til sanns vegar færa á ýmsum sviðum. En hvaða velmegun er það nákvæmlega ef íslenskar fjölskyldur eru hættar að vilja fjölga sér? Aðstæðurnar verða verri og verri, húsnæðismarkaðurinn sprunginn og kerfin sprungin. Fyrir þessa 50.000 Íslendinga sem öllum finnst svona áríðandi að séu í útlöndum verður sífellt minna fýsilegt að koma heim. Jú, það væri kannski eðlilegt ef það væru 15.000 útlendingar hér og 15.000 Íslendingar í útlöndum, einhver þannig skipti, en á einhverjum tímapunkti verða þetta óeðlileg hlutföll. Við erum að ræða hvenær það er orðið. Svo er sagt að við eigum ekki að hafa séríslenskar reglur. Ég held að við eigum að hafa séríslenskar reglur og við eigum að grípa til aðgerða sem þjóna hagsmunum Íslendinga og okkar samfélags og við þurfum ekki alltaf að réttlæta þær með einhverri vísan til Norðurlandanna. Við grípum til þeirra aðgerða sem virka fyrir Íslendinga og erum óhrædd við það en ekki alltaf að bera í bætifláka fyrir hvert einasta litla skref okkar með vísan til Norðurlandanna. Mér er alveg sama hvað þau eru að gera. Ef það virkar vel þá getum við tekið það upp, en við erum fyrst og fremst að hugsa um hagsmuni Íslendinga til allrar framtíðar.

Það er nauðsynlegt að ræða það af alvöru hversu ósjálfbær þróunin er orðin. Hérna á milli ára núna er fjölgunin mjög hæg, 2024–2025, úr 69.000 í 73.000 innflytjendur á Íslandi. Þetta er mjög hægt ár, þetta eru 4.000. (Forseti hringir.) Það er samt aukið hlutfall um 1% á meðal innflytjenda, bættu 20–30 árum við og þá verða Íslendingar í minni hluta. (Forseti hringir.) Það er alveg augljóst og við getum bara sagt það fullum fetum. Það er kominn tími til að við gerum það hér í þinginu.