kílómetragjald á ökutæki.
Virðulegur forseti. Við erum komin hér í lok umræðunnar um kílómetragjald, mál sem við höfum rætt hér margoft og á mörgum þingum í ýmsum myndum undanfarin ár. Það er alveg ljóst, og ég sagði það hér í minni ræðu, að við í Framsókn gerum okkur grein fyrir því að það þarf að breyta kerfinu. Formaður Framsóknarflokksins lagði til breytingar á kerfinu, þessu kílómetragjaldi, sem ekki náðist í gegn á síðasta þingi. Við höfum þess vegna verið spurð: Af hverju eruð þið þá ekki með málinu núna? Hvað breyttist? Það er þá ágætt að upplýsa það hér í lokin að ekki náðist sátt um að klára málið á síðasta þingi. Það var stöðvað, m.a. vegna þess að tímalínan var allt of knöpp. Það var ekki hægt að leggja álögur á bílaleigur með þeim stutta fyrirvara sem gert var ráð fyrir þá, eins og menn eru að gera núna.
Virðulegur forseti. Það er frumvarpið sem hefur breyst. Það er ýmislegt í frumvarpinu sem er orðið þess eðlis að ekki er hægt að greiða því atkvæði. Það er ekki hægt að una því eins og það er útfært hér. Mig langar að nefna nokkur dæmi. Það fyrsta sem ég ætla að nefna er landsbyggðin og þau áhrif sem frumvarpið mun hafa á landsbyggðina, á fyrirtæki og fólk á landsbyggðinni. Í því frumvarpi sem við sjáum núna kemur það fram, og það er beinlínis sagt, að þetta mun hafa áhrif á vöruverð á landsbyggðinni. Þetta mun hafa áhrif til hækkunar á vöruverði á landsbyggðinni. Við höfum lagt til og talað um að festa gjald fyrir tengivagna í 70% til að ná fram ákveðnu hlutleysi í kostnaði fyrir fyrirtæki á landsbyggðinni. Á það hefur ekki verið fallist. Hins vegar er það sett í 60% á næsta ári, 80 og 100% árið þar á eftir. Þetta mun þýða í sinni einföldustu mynd að vörur á landsbyggðinni munu hækka. Það verður dýrara fyrir fyrirtæki sem staðsett eru á landsbyggðinni að fá til sín vörur, matvörur þar á meðal. Það verður dýrara fyrir fyrirtæki á landsbyggðinni að senda frá sér vörur þannig að rekstrarskilyrði þeirra fyrirtækja munu versna. Það verður ekki eins hagstætt að vera með atvinnustarfsemi úti á landi og í því kerfi sem við erum með í dag.
Virðulegur forseti. Þetta getum við í Framsókn engan veginn samþykkt. Þetta getum við ekki samþykkt og þetta getum við ekki sætt okkur við. Þetta hefur verið gagnrýnt en á það hefur ekki verið hlustað og það er miður. Það er miður vegna þess að það er fólkið á landsbyggðinni, við sem þar búum, sem mun finna fyrir þessari skattahækkun ásamt öðru. Þetta er hluti af 30 milljarða kr. skattahækkun ríkisstjórnarinnar sem mun taka gildi 1. janúar. Þetta eru 30 milljarðar kr. Og bílaleigurnar — á þær var bara ekkert hlustað, ekki neitt. Og hver verða áhrifin á bílaleigurnar? Við erum farin að sjá þau strax. Við höfum séð að útibúum bílaleiga á landsbyggðinni hefur verið lokað eða á að fara að loka. Það er þjónustuskerðing fyrir okkur sem þar búum. Allt vegna þess að kostnaðurinn sem af þessu frumvarpi hlýst er svo mikill að bílaleigurnar sjá ekki annan kost en að taka verulega til í sínum rekstri. Talað hefur verið um 1,5 milljarða sem kostnað bílaleiganna á næsta ári, sem þær eiga að bera, og hærri tölur hafa verið nefndar.
Virðulegur forseti. Þetta frumvarp, þær breytingar sem gerðar hafa verið á frumvarpinu og sú hugmyndafræði sem hér birtist, þó sérstaklega gagnvart landsbyggðinni, er þannig að það er ógerningur fyrir okkur sem þar búum og stöndum vörð um þá hagsmuni að samþykkja þetta frumvarp.
